ഹൈദരാബാദ്: 56ാമത് അന്തര്‍ സംസ്ഥാന സീനിയര്‍ അത്‌ലറ്റിക്‌സ് ചാംപ്യന്‍ഷ് കിരീടം കേരളം നിലനിര്‍ത്തി. 164 പോയിന്റുകള്‍ നേടിയാണ് കേരളം ചാംപ്യന്‍പട്ടം നിലനിര്‍ത്തിയത്. 150 പോയിന്റുമായി തമിഴ്‌നാടാണ് രണ്ടാം സ്ഥാനത്ത്. പുരുഷ വിഭാഗത്തില്‍ 68 പോയിന്റുമായി ഒന്നാമതെത്തിയ കേരളം വനിതാ വിഭാഗത്തില്‍ 96 പോയിന്റുമായി ഒന്നാം സ്ഥാനം സ്വന്തമാക്കി. പുരുഷ വിഭാഗത്തില്‍ ഹരിയാനയും വനിതകളില്‍ തമിഴ്‌നാടുമാണ് രണ്ടാം സ്ഥാനത്ത്. കേരളത്തിന്റെ ജിതിന്‍ പോള്‍ മികച്ച പുരുഷ താരമായും ഹരിയാനയുടെ നിര്‍മല മികച്ച വനിതാ താരമായും തിരഞ്ഞെടുക്കപ്പെട്ടു.

മേളയുടെ അവസാന ദിനത്തില്‍ കേരളത്തിനു രണ്ടു വെള്ളി മെഡലാണ് സ്വന്തമാക്കാനായത്. വനിതകളുടെ ഹൈ ജംപില്‍ കേരളത്തിന്റെ എയ്ഞ്ചല്‍ പി ദേവസ്യ 1.73 മീറ്റര്‍ താണ്ടി വെള്ളി നേടിയപ്പോള്‍ വനിതകളുടെ 1500 മീറ്ററില്‍ പി.യു ചിത്രയാണ് കേരളത്തിനായി രണ്ടാം വെള്ളി സ്വന്തമാക്കിയത്.

അവസാന ദിനത്തില്‍ ഉത്തര്‍പ്രദേശിന്റെ അന്നു റാണി ജാവലിന്‍ ത്രോയിലെ തന്റെ തന്നെ ദേശീയ റെക്കോര്‍ഡിനൊപ്പമെത്തുന്ന പ്രകടനം നടത്തി. 59.87 മീറ്റര്‍ എറിഞ്ഞാണ് അന്നു സ്വര്‍ണം നേടിയത്.