കൊച്ചി: ലോക്ക് ഡൗണ്‍ ലംഘിച്ച് പ്രഭാതസവാരിക്കിറങ്ങിയവര്‍ കൊച്ചിയില്‍ അറസ്റ്റില്‍. പനമ്പിള്ളി നഗറില്‍ നിന്ന് സ്ത്രീകളടക്കം 41 പേരെ പോലീസ് അറസ്റ്റ് ചെയ്തു. കഴിഞ്ഞ ദിവസം ഡ്രോണ്‍ വഴി നടത്തിയ പരിശോധനയിലാണ് പ്രഭാതസവാരിക്കാര്‍ പനമ്പിള്ളി നഗറില്‍ സജീവമാണെന്ന് മനസിലായത്.
എപ്പിഡെമിക് ഡീസീസസ് ആക്ട് അനുസരിച്ച് ഇവര്‍ക്കെതിരെ കേസ് രജിസ്റ്റര്‍ ചെയ്ത് ജാമ്യത്തില്‍ വിട്ടയച്ചു.

സംസ്ഥാനസര്‍ക്കാര്‍ ലോക്ക് ഡൗണ്‍ പ്രഖ്യാപിച്ച സമയത്ത് തന്നെ രാവിലെ പ്രഭാതനടത്തത്തിനോ, വൈകിട്ട് സായാഹ്നസവാരിക്കോ പുറത്തിറങ്ങരുതെന്ന് നിര്‍ദേശമുണ്ടായിരുന്നു. പൊലീസ് പരിശോധനയില്‍ അല്‍പമൊരു അയവ് വന്നതോടെ വീണ്ടും പനമ്പള്ളി നഗര്‍ ഉള്‍പ്പടെയുള്ള മേഖലയില്‍ ആളുകള്‍ കൂട്ടത്തോട
പുറത്തിറങ്ങി നടക്കുന്നുണ്ട് എന്ന വിവരത്തെത്തുടര്‍ന്നാണ് പൊലീസ് ഇവിടെ നിരീക്ഷണം നടത്തിയത്.

സംസ്ഥാനത്ത് ഇന്നലെ മാത്രം ലോക്ക് ഡൗണ്‍ ലംഘനത്തില്‍ റജിസ്റ്റര്‍ ചെയ്തത് 1991 കേസുകളാണ്. 1949 പേരെ അറസ്റ്റ് ചെയ്തു.