പെരിന്തല്‍മണ്ണ: പരിസ്ഥിതിയെ സംരക്ഷിക്കുന്നതും അതിന്റെ തനിമ നിലനിര്‍ത്തുന്നതും വിശ്വാസത്തിന്റെ ഭാഗമായിട്ടാണ് ഇസ്‌ലാം പഠിപ്പിക്കുന്നതെന്ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ അഭിപ്രായപ്പെട്ടു. എസ്.കെ എസ്.എസ്.എഫ് സന്നദ്ധ വിഭാഗമായ വിഖായ പരിസ്ഥിതി ദിനാചരണത്തിന്റെ സംസ്ഥാനതല ഉദ്ഘാടനം തിരൂര്‍ക്കാട് നിര്‍വഹിക്കുകയായിരുന്നു അദ്ദേഹം.
പരിസ്ഥിതി ദിനത്തില്‍ സംസ്ഥാനത്ത് തെരഞ്ഞെടുക്കപ്പെട്ട കേന്ദ്രങ്ങളില്‍ വിഖായ പ്രവര്‍ത്തകര്‍ ഒരു ലക്ഷം തൈകള്‍ നട്ടുപിടിപ്പിക്കും.കഴിഞ്ഞ വര്‍ഷങ്ങളില്‍ നട്ടുപിടിപ്പിച്ച തൈകള്‍ കൃത്യമായി പരിചരിച്ചവര്‍ക്കുള്ള സമ്മാന ദാനവും ചടങ്ങില്‍ നടക്കും. ആരോഗ്യ വകുപ്പ് ഉദ്യോഗസ്ഥരുടെ സഹകരണത്തോടെ ബോധവല്‍ക്കരണം, മാലിന്യ നിര്‍മാര്‍ജനം തുടങ്ങിയ പ്രവര്‍ത്തനങ്ങള്‍ക്കും വിഖായ പ്രവര്‍ത്തകര്‍ നേതൃത്വം നല്‍കും. സംസ്ഥാന സെക്രട്ടേറിയറ്റ് അംഗം ജലീല്‍ ഫൈസി അരിമ്പ്ര അധ്യക്ഷനായി. ജില്ലാ ജനറല്‍ സെക്രട്ടറി ശമീര്‍ ഫൈസി ഒടമല, വിഖായ സംസ്ഥാന ചെയര്‍മാന്‍ സലാം ഫറോക്ക്, കണ്‍വീനര്‍ സല്‍മാന്‍ ഫൈസി തിരൂര്‍ക്കാട്, നിസാം ഓമശ്ശേരി, പി.ടി അന്‍വര്‍ ഹുദവി, കെ.ടി അബ്ദുല്‍ ജബ്ബാര്‍ മാസ്റ്റര്‍, ശമീര്‍ നാട്ടുകല്‍, കെ.കെ ശരീഫ് ഫൈസി, ശിഹാബ് പേരയില്‍ പ്രസംഗിച്ചു.