വഴിക്കടവ്: മുണ്ട പ്രദേശത്ത് ജനല്‍ വഴി എത്തിനോട്ടവും മോഷണവും നടത്തിയ പ്രതി പൊലിസിന്റെ പിടിയിലായി. വഴിക്കടവ് മുണ്ട പറമ്പില്‍ ജനീഷ് (മത്തവെള്ളം കുഞ്ഞന്‍-33) ആണ് പിടിയിലായത്. മാര്‍ച്ച് 19ന് ആശുപത്രിക്കു സമീപത്തുള്ള വീട്ടില്‍ ഓട് നീക്കി ഒറ്റക്കു താമസിക്കുകയായിരുന്ന യുവതിയുടെ മൊബൈല്‍ ഫോണും 10,000 രൂപയും മോഷണം പോയതായി പൊലിസിനു പരാതി ലഭിച്ചിരുന്നു. കൂടാതെ മാസങ്ങളായി വീടുകളില്‍ ജനല്‍ വഴി ഒളിഞ്ഞുനോട്ടവും നടക്കുന്നതായി പരാതിയുണ്ടായിരുന്നു. ഇതേ തുടര്‍ന്ന് എടക്കര സി.ഐ പി.കെ സന്തോഷിന്റെ നേതൃത്വത്തില്‍ എസ്.ഐ, എ.എസ്.ഐ എം.അസൈനാര്‍, വഴിക്കടവ് എ.എസ്.ഐ ജയകൃഷ്ണന്‍ സി.പി.ഒമാരായ സുനില്‍, സലീല്‍ ബാബു എന്നിവരടങ്ങുന്ന സംഘം നടത്തിയ അന്വേഷണത്തിലാണ് പ്രതിയെ പിടികൂടിയത്. യുവതിയുടെ മൊബൈല്‍ ഫോണ്‍ പ്രതിയുടെ കൈവശത്തുനിന്നും കിട്ടി. രണ്ടുസിം കാര്‍ഡുകള്‍ വീട്ടില്‍ നിന്നും ഒളിപ്പിച്ച നിലയിലും കണ്ടെത്തിയിട്ടുണ്ട്.
പ്രദേശത്തെ കോഴികളെ മോഷ്ടിച്ചതിനെ പ്രതിയെ മുന്‍പ് നാട്ടുകാര്‍ പിടികൂടി താക്കീത് നല്‍കിയിരുന്നു. പ്രതിയെ ഇന്ന് കോടതിയില്‍ ഹാജരാക്കും.