കാവുംമന്ദം: ഹൈദരാബാദില്‍ നടന്നു വരുന്ന ഒളിമ്പിക്‌സ് യോഗ്യതാ മീറ്റായ ദേശീയ സീനിയര്‍ അത്‌ലറ്റിക് ചാമ്പ്യന്‍ഷിപ്പില്‍ ഹെപ്റ്റാത്തലണ്‍ മത്സരത്തില്‍ വെങ്കല മെഡല്‍ നേടിയ വയനാട് കാവുംമന്ദം സ്വദേശിനി അനില ജോസ് നാടിന് അഭിമാനമായി.
ചങ്ങനാശേരി അസംപ്ഷന്‍ കോളജില്‍ എം.എ ഇംഗ്ലീഷ് അവസാന വര്‍ഷ വിദ്യാര്‍ഥിനിയായ അനില ജോസ് കാവുംമന്ദം തരിയോട് വേങ്ങാച്ചുവട്ടില്‍ ജോസ് ലില്ലി ദമ്പതികളുടെ മകളാണ്. കായിക രംഗത്ത് ഒട്ടേറെ നേട്ടങ്ങള്‍ കരസ്ഥമാക്കിയ അനില എട്ടാം തരം മുതല്‍ പ്ലസ്ടു വരെ പഠിച്ചത് കണ്ണൂര്‍ ഗേള്‍സ് വൊക്കേഷനല്‍ ഹയര്‍ സെക്കന്‍ഡറി സ്‌കൂളിലും ബിരുദ പഠനം മുതല്‍ ചങ്ങനാശേരിയിലുമാണ്.
അടുത്ത ഏഷ്യന്‍ ഗെയിംസില്‍ പങ്കെടുത്ത് മെഡല്‍ നേടണമെന്നതാണ് അനിലയുടെ ആഗ്രഹം. ഡോ. അമല്‍ ജോസ് സഹോദരനാണ്.