കൊറോണ വ്യാപനം തടയുന്നതിന്‌ സഊദി അറേബ്യയിൽ കടുത്ത നിയന്ത്രണങ്ങളാണ്‌ ഏർപ്പെടുത്തിയിട്ടുള്ളത്. ഇതിന്റെ ഭാഗമായി രാജ്യത്തെ 13 പ്രവിശ്യകളും അടച്ചിട്ടുണ്ട്. ഈ സമയത്ത് പ്രവിശ്യകൾ വിട്ട് പോകുന്നതും പ്രവേശിക്കുന്നതിനും വിലക്കേർപ്പെടുത്തിയിട്ടുമുണ്ട്.  ഇക്കാരണത്താൽ ചികിത്സയടക്കം അടിയന്തിര ആവശ്യങ്ങൾക്ക് പ്രവിശ്യകൾ മാറി യാത്ര ചെയ്യേണ്ടതിന്റെ അനിവാര്യത മനസ്സിലാക്കിയാണ്‌ പൊതു സുരക്ഷാ വകുപ്പ് ഇത്തരമൊരു സേവനം ആരംഭിച്ചിരിക്കുന്നത്. സേവനം ആവശ്യമായ സ്വദേശി പൗരന്മാർ പേരും ഹവിയ്യ നമ്പറും മൊബൈൽ നമ്പറും രജിസ്റ്റർ ചെയ്യണം.

 

വിദേശികളാവട്ടെ പേരും ഇഖാമ നമ്പറും ഫോൺ നമ്പറും രജിസ്റ്റർ ചെയ്താണ്‌ പെർമിറ്റിന്‌ അപേക്ഷിക്കേണ്ടത്. രജിസ്റ്റർ ചെയ്ത ഫോണിലേക്ക് വരുന്ന ഒ.ടി.പി നമ്പർ നൽകിയാൽ മാത്രമെ അപേക്ഷാ നടപടികൾ പൂർത്തിയാവുകയുള്ളൂ. അതെ സമയം മറ്റൊരു  പ്രവിശ്യയിലേക്ക് പോകേണ്ട അടിയന്തിര സാഹചര്യമെന്തെന്ന് പ്രത്യേക കോളത്തിൽ പരാമർശിക്കുകയും അതിന്റെ സാധൂകരിക്കുന്ന രേഖകൾ അതിൽ അറ്റാച്ച് ചെയ്യുകയും വേണം.

 

ഈ അപേക്ഷ കിട്ടിയാലുടൻ അപേക്ഷകർക്ക് ഇത് സംബന്ധമായ എസ്.എം.എസ് ലഭിക്കും.ഇതിന്‌ ശേഷം അപേക്ഷകന്റെ രേഖകൾ ബന്ധപ്പെട്ട വകുപ്പുകൾ പരിശോധിക്കുകയും ബോധ്യപ്പെട്ടാൽ അപേക്ഷ അംഗീകരിച്ചതായി വീണ്ടും എസ്.എം.എസ് വഴി സന്ദേശം നൽകുകയും ചെയ്യും. യാത്രാ സമയം, റൂട്ട് എന്നിവ ഇതിനോടൊപ്പം അപേക്ഷകനെ അറിയിക്കും. പൂർണ്ണമല്ലാത്ത അപേക്ഷകൾ പരിഗണിച്ചില്ലെങ്കിലും ആ വിവരം അപേക്ഷകനെ അറിയിക്കുമെന്നും പൊതു സുരക്ഷാ വകുപ്പ് അറിയിച്ചു.