കാലടി: റമദാനില്‍ നോമ്പ് നോറ്റും മറ്റ് സല്‍കര്‍മങ്ങള്‍ ചെയ്തും നേടിയെടുക്കുന്ന സംസ്‌കരണ ബോധവും ജീവിത വിശുദ്ധിയും റമദാനിന് ശേഷവും നിലനിര്‍ത്തണമെന്ന് പാണക്കാട് സയ്യിദ് ഫൈനാസ് അലി ശിഹാബ് തങ്ങള്‍.
ജീവിതത്തില്‍ ദിനചര്യകള്‍ പ്രവാചക ജീവിതമായി ബന്ധപ്പെടുത്തണമെന്നും ഒരു മനുഷ്യന്റെ ജീവിതത്തിന് പ്രവാചകചര്യ എക്കാലത്തും മാതൃകയാണന്നും അദ്ദേഹം പറഞ്ഞു. മേക്കാലടി ജുമാ മസ്ജിദില്‍ പുനര്‍നിര്‍മിച്ച കെട്ടിടത്തിന്റെ ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം. തുടര്‍ന്ന് നടന്ന ദുആ സമ്മളനത്തിനും തൗബാ മജ്‌ലിസിനും തങ്ങള്‍ നേതൃത്വം നല്‍കി.
മേക്കാലടി ജമാഅത്ത് ചീഫ് ഇമാം ഇ.എ.എം സഹല്‍ ഫൈസി, ജമാഅത്ത് പ്രസിഡന്റ് എം.എ സലി, സെക്രട്ടറി എ.എം നവാസ്, മുദ്‌രിസ് സിദ്ധീഖ് അഹസനി ചെമ്മാട് തുടങ്ങിയവര്‍ സംസാരിച്ചു.