കൊച്ചി: കൊവിഡ് രോഗനിര്‍ണയം മുതല്‍ കുട്ടികള്‍ക്ക് വിഡിയോ ഗെയിം കളിക്കുന്നതിന് വരെ അവസരമൊരുക്കുന്ന വെബ്‌സൈറ്റുമായി ടി.ജെ വിനോദ് എം.എല്‍.എ. ംംം.രമൃലലസാ.രീാ എന്ന വെബ് സൈറ്റിലാണ് ഒരു 'ചാറ്റ് ബോട്ട്' വഴി ആരോഗ്യനില അറിയിക്കാനും നിമിഷങ്ങള്‍ക്കുള്ളില്‍ രോഗലക്ഷണങ്ങള്‍ ഉണ്ടോയെന്ന് ബോധ്യപ്പെടാനും ആവശ്യമെങ്കില്‍ ചികിത്സയിലേക്ക് പോകാനുമുള്ള സൗകര്യമുള്ളത്. ചെന്നൈ അപ്പോളോ ഉള്‍പ്പെടെയുള്ള ഇന്ത്യയിലെ പ്രമുഖ ആശുപത്രികള്‍ ലഭ്യമാക്കുന്ന ഓണ്‍ലൈന്‍ സൗകര്യം കൂടിയാണിത്.
ലോക്ക്ഡൗണില്‍ കഴിയുന്ന കുടുംബങ്ങള്‍ക്ക് എറണാകുളത്തെയും പരിസര പ്രദേശങ്ങളിലെയും ഭക്ഷ്യ ലഭ്യത, മരുന്നുകള്‍ ലഭിക്കുന്ന സ്ഥലങ്ങള്‍, ആരോഗ്യ പ്രവര്‍ത്തകരുടെ വിവരങ്ങള്‍ തുടങ്ങിയവയും വെബ്‌സൈറ്റിലുണ്ട്.
വീടുകളിലും മറ്റും ഒറ്റപ്പെട്ടു കഴിയേണ്ട സാഹചര്യത്തില്‍ ഏതെങ്കിലും തരത്തിലുള്ള മാനസിക സംഘര്‍ഷം അനുഭവിക്കുന്നവര്‍ക്കായി എം.എല്‍.എ ഏര്‍പ്പെടുത്തിയിട്ടുള്ള കൗണ്‍സിലിങ് സൗകര്യങ്ങളുടെ വിശദാംശങ്ങളും കുട്ടികള്‍ക്കായി ക്വിസ്, ഫ്‌ളാഷ് ഗെയിമുകള്‍, വിഡിയോകള്‍ എന്നിവയും വെബ്‌സൈറ്റില്‍ ഉള്‍പ്പെടുത്തിയിട്ടുണ്ട്. നടന്‍ മമ്മൂട്ടിയാണ് ഇന്നലെ രാവിലെ തന്റെ ഫേസ്ബുക്ക് പേജിലൂടെ വെബ്‌സൈറ്റ് ലോഞ്ച് ചെയ്തത്.
ഒരു കൂട്ടം ചെറുപ്പക്കാരുടെ നേതൃത്വത്തില്‍ കൊച്ചി കേന്ദ്രമായി പ്രവര്‍ത്തിക്കുന്ന 'സ്‌ട്രോക്ക്‌സ് ടെക്‌നോളജീസ്' എന്ന സോഫ്റ്റ് വെയര്‍ കമ്പനിയാണ് വെബ് സൈറ്റിന്റെ സാങ്കേതിക സഹായങ്ങള്‍ നല്‍കുന്നത്.