കണ്ണൂര്‍: കണ്ണൂര്‍ സലീം സ്മാരക സ്വര്‍ണക്കപ്പിനും 50,000 രൂപ കാഷ് അവാര്‍ഡിനും വേണ്ടിയുള്ള ആറാമത് എ.പി.എസ് വളപട്ടണം സെവന്‍സ് ഫുട്‌ബോള്‍ ടൂര്‍ണമെന്റിന് നാളെ പഞ്ചായത്ത് ഫ്‌ളഡ്‌ലിറ്റ് സ്റ്റേഡിയത്തില്‍ തുടക്കമാവും. നാളെ രാത്രി 7.30ന് എസ്.പി ജി ശിവവിക്രം ഉദ്ഘാടനം ചെയ്യും. വളപട്ടണം പഞ്ചായത്ത് പ്രസിഡന്റ് എന്‍.പി മനോരമ അധ്യക്ഷയാകും. ടൂര്‍ണമെന്റില്‍ ദേശീയ സംസ്ഥാന താരങ്ങള്‍ ഉള്‍പ്പെടുന്ന 14 ടീമുകള്‍ അണിനിരക്കും. ഏപ്രില്‍ 16ന് ഫൈനല്‍. 8,000 പേര്‍ക്ക് ഇരിക്കാവുന്ന ഗാലറിയും റോസ്ട്രവും ഇതിനകം ഒരുക്കികഴിഞ്ഞു. ഉദ്ഘാടന മത്സരത്തില്‍ കെ.ആര്‍.എസ് കോഴിക്കോടും റോവേഴ്‌സ് പാപ്പിനിശ്ശേരിയും ഏറ്റുമുട്ടും. കെ.എസ്.എഫ്.എ അംഗീകാരമുള്ള ടൂര്‍ണമെന്റില്‍ കളിക്കാര്‍ക്കും കാണികള്‍ക്കും ഇന്‍ഷൂറന്‍സ് പരിരക്ഷ ഉറപ്പാക്കിയിട്ടുണ്ടെന്ന് ഭാരവാഹികള്‍ അറിയിച്ചു. വാര്‍ത്താസമ്മേളനത്തില്‍ പി.എം ഫയാസ്, എന്‍.പി സമദ്, പി.വി നൗഷാദ്, പി.എം മുജീബ്, സി.വി നൗഷാദ് പങ്കെടുത്തു.