മൈക്കിനു മുന്നിലെത്തിയാല്‍ ആളിപ്പടരുന്ന തീപ്പന്തമായിരുന്നു നന്ദനന്‍. കറുത്തു മെലിഞ്ഞ ഈ മനുഷ്യന്‍ വാക്കുകളില്‍ ഊര്‍ജം നിറയ്ക്കുകയും അതു കേള്‍വിക്കാരിലേക്ക് പ്രസരിപ്പിക്കുകയും ചെയ്തു
തളിപ്പറമ്പ്: രാഷ്ട്രീയ പൊതുയോഗങ്ങളില്‍ ഒരു കാലഘട്ടത്തില്‍ കേള്‍വിക്കാരെ ആവേശംകൊള്ളിച്ച തീപ്പൊരി പ്രാസംഗികന്‍ കെ.സി നന്ദനന്‍(79) ഇനി ജ്വലിക്കുന്ന ഓര്‍മ്മ. തളിപ്പറമ്പ് ഏഴാംമൈലിലെ വാടകവീട്ടില്‍ വിശ്രമജീവിതം നയിച്ചുവരികയായിരുന്നു വിപ്ലവ പോരാളി. മൈക്കിനു മുന്നിലെത്തിയാല്‍ ആളിപ്പടരുന്ന തീപന്തമായിരുന്നു നന്ദനന്‍. കറുത്തു മെലിഞ്ഞ ഈ മനുഷ്യന്‍ വാക്കുകളില്‍ ഊര്‍ജം നിറയ്ക്കുകയുംഅതു കേള്‍വിക്കാരിലേക്ക് പ്രസരിപ്പിക്കുകയും ചെയ്തു.
അക്കാലത്ത് നന്ദനന്‍ പ്രസംഗിച്ചിരുന്ന യു.ഡി.എഫ് യോഗങ്ങളില്‍ ആശയവിയോജിപ്പു കാത്തുസൂക്ഷിക്കുന്ന ഇടതുമുന്നണി പ്രവര്‍ത്തകര്‍പോലും പങ്കെടുത്തു.
1982ലെ നിയമസഭാ തെരഞ്ഞെടുപ്പില്‍ തലശേരിയില്‍ കോടിയേരി ബാലകൃഷ്ണനെതിരേ ആര്‍.എസ്.പി(എസ്) സ്വതന്ത്ര സ്ഥാനാര്‍ഥിയായി നന്ദനന്‍ മത്സരിച്ചിരുന്നു. തീപ്പന്തം ആയിരുന്നു അടയാളം. ആ തെരഞ്ഞെടുപ്പില്‍ കോടിയേരി 17,100 വോട്ടുകള്‍ക്കു വിജയിച്ചു. 1986ല്‍ എം.വി രാഘവന്‍ സി.എം.പി രൂപീകരിച്ചപ്പോള്‍ കൂത്തുപറമ്പിലെ വീട്ടില്‍ ചെന്നു നന്ദനനെ പാര്‍ട്ടിയിലേക്കു ക്ഷണിച്ചുകൊണ്ടുവരികയായിരുന്നു. സി.പി.എമ്മിന്റെ ഭീഷണി നേരിട്ടു സി.എം.പിക്കു വേണ്ടി കാസര്‍കോടു മുതല്‍ തിരുവനന്തപുരം വരെ നന്ദനന്‍ ഇടതടവില്ലാതെ പ്രസംഗിച്ചുനടന്നു. മലപ്പുറത്ത് ഒരിക്കല്‍ പ്രസംഗിച്ചുകൊണ്ടിരിക്കേ രക്തം ഛര്‍ദ്ദിച്ചു കുഴഞ്ഞുവീണിരുന്നു. സി.പി.എമ്മിന്റെ ശക്തമായ എതിര്‍പ്പുകള്‍ നേരിട്ടു വളര്‍ന്നുവന്ന സി.എം.പി, സി.പി.എം പാളയത്തിലേക്കു പോകുന്നത് നന്ദനന്‍ അംഗീകരിച്ചിരുന്നില്ല. പിണറായി വിജയന്‍ മുഖ്യമന്ത്രിയായി ചുമതലയേറ്റതിനു ശേഷം കെ.സി നന്ദനനെ തളിപ്പറമ്പ് ഏഴാംമൈലിലെ വാടകവീട്ടില്‍ സന്ദര്‍ശിച്ചിരുന്നു.
എതിരാളികളെ പോലും പിടിച്ചിരുത്തുന്ന പ്രസംഗപാടവം കൈമുതലായ നന്ദനനു രാഷ്ട്രീയം ഒരിക്കലും ഉപജീവനമാര്‍ഗമായിരുന്നില്ല. തന്റെ പ്രസംഗശൈലിയാല്‍ എതിരാളികളെ അമ്പരപ്പിക്കാനും അവരുടെ ആദരവ് നേടാനും അദ്ദേഹത്തിനു സാധിച്ചു. ജീവിതത്തിന്റെ അരങ്ങില്‍ നിന്നു ആ തീപ്പൊരി പ്രാസംഗികന്‍ വിടപറഞ്ഞു. തീപന്തം ഇനി ഓര്‍മ്മ.