ജിദ്ദ: സഊദി ലോകകപ്പിനായുള്ള ടീമിനെ പ്രഖ്യാപിച്ചു. ലാലിഗയില്‍ അരങ്ങേറ്റം കുറിച്ച് ഏക സഊദി അറേബ്യന്‍ താരമായ ഫവദ് അല്‍മുവലദ് ഉള്‍പ്പെടെയുള്ള 23 അംഗങ്ങളെയാണ് കോച്ച് യുവാന്‍ അന്‍േറാണിയോ പിസ്സി പ്രഖ്യാപിച്ചിരിക്കുന്നത്.

അതേ സമയം ടീമില്‍ നിന്ന് നവാഫ് അല്‍ ആബിദിനെ പുറത്താക്കി. നാഭീപേശിയിലുണ്ടായ പരുക്ക് പൂര്‍ണമായും ഭേതമാകാത്തതിനാലാണ് ഒരു വ്യാഴവട്ടത്തിന് ശേഷം സഊദി പങ്കെടുക്കുന്ന ലോകകപ്പ് നവാഫിന് നഷ്ടമായത്.

അല്‍ഹിലാല്‍ ക്ലബിന്റെ പ്ലേമേക്കറായ 28 കാരന് ഈ വര്‍ഷം തുടക്കത്തിലാണ് പരുക്കേറ്റത്. ജനുവരി എട്ടിന് സഊദി പ്രോ ലീഗില്‍ ഇത്തിഫാഖിനെതിരെ കളിക്കുമ്പോഴായിരുന്നു സംഭവം. 14ാം മിനുട്ടില്‍ പരുക്കേറ്റ് കളംവിട്ട നവാഫ് ജനുവരി 17 ന് ശസ്ത്രക്രിയക്ക് വിധേയനായി. തുടര്‍ന്ന് മാസങ്ങളോളം കളം വിട്ടുനിന്ന നവാഫിനെ ലോകകപ്പിന്റെ പ്രാഥമിക സാധ്യതാ ടീമില്‍ ഉള്‍പ്പെടുത്തിയിരുന്നു.

പരീക്ഷണമെന്നോണം കഴിഞ്ഞ ദിവസം പെറുവിനെതിരെ നടന്ന സന്നാഹമത്സരത്തില്‍ സബ്സ്റ്റിറ്റിയൂട്ടായി ഇറക്കി 22 മിനിറ്റ് കളിപ്പിക്കുകയും ചെയ്തു. അതിന് ശേഷമാണ് ടീമില്‍ നിന്ന് ഒഴിവാക്കിക്കൊണ്ടുള്ള പ്രഖ്യാപനം വന്നത്.

ഗോള്‍കീപ്പര്‍ അസ്സാഫ് അല്‍ഖര്‍നി, ഡിഫന്‍ഡര്‍മാരായ മുഹമ്മദ് ജഹ്ഫലി, സഈദ് അല്‍ മുവല്ലദ്, മിഡ്ഫീല്‍ഡര്‍ മുഹമ്മദ് അല്‍ കുവൈക്ബി എന്നിവരെയും ഒഴിവാക്കി. അന്തിമ ടീമില്‍ സഊദി പ്രോ ലീഗ് ചാമ്പ്യന്‍മാരായ അല്‍ഹിലാല്‍ ക്ലബില്‍ നിന്നുള്ള 10 കളിക്കാരുണ്ട്. അല്‍അഹ്‌ലിയില്‍ നിന്ന് ഏഴുപേരും.

ടീം ഇങ്ങനെ: ഗോള്‍ കീപ്പര്‍മാര്‍: യാസിര്‍ അല്‍ മുസൈലിം, അബ്ദുല്ല അല്‍മയൂഫ്, മുഹമ്മദ് അല്‍ ഉവൈസ്.ഡിഫന്‍ഡര്‍മാര്‍: ഉസാമ ഹവസാവി, മുതാസ് ഹവസാവി, ഉമര്‍ ഹവസാവി, യാസല്‍ അല്‍ശഹ്‌റാനി, മന്‍സൂര്‍ അല്‍ഹാര്‍ബി, മുഹമ്മദ് അല്‍ബുറൈക്, അലി അല്‍ ബുലൈഹി. മിഡ്ഫീല്‍ഡര്‍മാര്‍: അബ്ദുല്ല ഉതൈഫ്, തൈസീര്‍ അല്‍ജാസിം, ഹുസൈന്‍ അല്‍മുഖാഹ്‌വി, സല്‍മാന്‍ അല്‍ഫറാജ്, സാലിം അല്‍ദോസരി, ഫഹദ് അല്‍മുവല്ലദ്, യഹ്‌യ അല്‍ശഹ്‌രി, അബ്ദുല്‍ മാലിക് അല്‍ഖൈബരി, മുഹമ്മദ് കാനൂ, അബ്ദുല്ല അഇ ഖൈബരി, ഹത്താന്‍ ബാഹിബ്രി. സ്‌ട്രൈക്കര്‍മാര്‍: മുഹമ്മദ് അല്‍ സഹ്‌ലാവി, മുഹമ്മദ് അസ്സീരി.

ഉദ്ഘാടന മത്സരം കാണാന്‍ കിരീടാവകാശിയും

ജിദ്ദ: ലോകകപ്പ് ഫുട്‌ബോളിന്റെ ഉദ്ഘാടന മത്സരത്തില്‍ സഊദി അറേബ്യ റഷ്യയുമായി ഏറ്റുമുട്ടുന്നത് കാണാന്‍ കിരീടാവകാശി അമീര്‍ മുഹമ്മദ് ബിന്‍ സല്‍മാനുമെത്തും. സഊദി ടീമിന് പിന്തുണയുമായി കിരീടാവകാശി എത്തുമെന്ന വാര്‍ത്തയെ രാജ്യത്തെ കായികപ്രേമികള്‍ ആവേശത്തോടെയാണ് സ്വീകരിച്ചത്.
ഈമാസം 14 ന് മോസ്‌കോയിലെ ലുസ്‌നികി സ്‌റ്റേഡിയത്തിലാണ് ഉദ്ഘാടന മത്സരം നടക്കുന്നത്. ലോകകപ്പിന്റെ ഉദ്ഘാടന മത്സരത്തില്‍ കളിക്കാന്‍ അവസരം ലഭിച്ച ആദ്യ അറബ് ടീമാണ് സഊദി അറേബ്യ.