കൊണ്ടോട്ടി: കേരളത്തിലെ 81 സ്വകാര്യ ഹജ്ജ് ഗ്രൂപ്പുകള്‍ക്ക് 6,114 സീറ്റുകള്‍ വീതിച്ചു നല്‍കി. കേന്ദ്ര വ്യോമയാന മന്ത്രാലയം ഇന്ത്യയിലെ സ്വകാര്യ ഗ്രൂപ്പുകള്‍ക്ക് നല്‍കിയ ക്വാട്ടയില്‍ നിന്നാണ് കേരളത്തിന് 6,114 സീറ്റുകള്‍ അനുവദിച്ചിട്ടുള്ളത്. കേരളത്തില്‍ നിന്ന് അവസരം ലഭിച്ച 81 ഗ്രൂപ്പുകളില്‍ 43 എണ്ണം ഒന്നാംകാറ്റഗറിയിലും 38 ഗ്രൂപ്പുകള്‍ രണ്ടാം കാറ്റഗറിയിലുമാണ് ഉള്‍പ്പെടുക. കേരളത്തിന് പുറത്ത് മലയാളികളുടേതായി പ്രവര്‍ത്തിക്കുന്ന ട്രാവല്‍ ഗ്രൂപ്പുകള്‍ വഴിയും ഈ വര്‍ഷം തീര്‍ഥാടകര്‍ പുറപ്പെടും. ഇതോടെ കേരളത്തില്‍ പതിനായിരത്തിലേറെ പേര്‍ക്കെങ്കിലും സ്വകാര്യ ഗ്രൂപ്പുകള്‍ വഴി ഹജ്ജ് തീര്‍ഥാടനത്തിന് പോകാനാവും.
ഇന്ത്യയില്‍ ഒന്നാം കാറ്റഗറിയില്‍ 331 ഗ്രൂപ്പുകള്‍ക്കും, രണ്ടാം കാറ്റഗറിയില്‍ 278 ഗ്രൂപ്പുകള്‍ക്കുമായി 46,323 സീറ്റുകളാണ് അനുവദിച്ചിട്ടുള്ളത്. കഴിഞ്ഞ വര്‍ഷത്തേക്കാള്‍ 1,323 സീറ്റുകളാണ് ഈ വര്‍ഷം കൂടുതലുള്ളത്. സഊദി സര്‍ക്കാര്‍ ഇന്ത്യക്ക് അവസാനം അനുവദിച്ച 5, 000 സീറ്റുകളില്‍ നിന്നാണ് 1,323 സീറ്റുകള്‍ അധികം ലഭിച്ചത്. കഴിഞ്ഞ വര്‍ഷം 45,000 സീറ്റുകളാണ് സ്വകാര്യ ഗ്രൂപ്പുകള്‍ക്ക് ലഭിച്ചിരുന്നത്. 2017-ല്‍ ക്വാട്ട ലഭിക്കാത്ത 87 ഗ്രൂപ്പുകള്‍ക്കും ഇത്തവണ ക്വാട്ട ലഭിച്ചിട്ടുണ്ട്.