മനാമ: കഴിഞ്ഞ ദിവസം ബഹ്‌റൈനിലെ ഈസ്റ്റ് എക്കറിലുണ്ടായ ബോംബ് സ്‌ഫോടനത്തില്‍ ഇറാന്റെ പങ്ക് ശക്തമാണെന്ന് ബഹ്‌റൈന്‍ എം.പി അബ്ദുള്ള ബിന്‍ ഹോവ. രണ്ടാഴ്ച മുന്‍പ് ബഹ്‌റൈനെതിരെ ഇറാന്‍ നേതാവ് കാസിം സുലൈമാനി നടത്തിയ ഭീഷണിയുടെ പരിണിത ഫലമാണ് ഈ സ്‌ഫോടനമെന്നും എം.പി കൂട്ടിച്ചേര്‍ത്തു.

കഴിഞ്ഞ കാലങ്ങളില്‍ ഭീകരവാദത്തിനെതിരെ ബഹ്‌റൈന്‍ എടുത്ത ചില തീരുമാനങ്ങളാണ് ഇറാനെ ചൊടിപ്പിച്ചിരിക്കുന്നത്. തീവ്രവാദത്തിനും വിഭാഗീയതയ്ക്കുമെതിരെയുള്ള നിലപാടുകള്‍ ബഹ്‌റൈന്‍ കൂടുതല്‍ ശക്തമാക്കുമെന്നും ഇറാന്റെ ഭീഷണിയെയും അക്രമങ്ങളെയും ചെറുത്തു തോല്‍പ്പിക്കുമെന്നും അദ്ദേഹം പറഞ്ഞു.

അതേസമയം ബോംബ് സ്‌ഫോടനത്തില്‍ കൊല്ലപ്പെട്ടത് സിത്ര അല്‍നൂര്‍ ഇന്റര്‍നാഷണല്‍ സ്‌കൂളിലെ അറബിക് അദ്ധ്യാപികയായ ഫഖ്‌രിയ മുസ്‌ലിം (42) ആണെന്ന് അധികൃതര്‍ വ്യക്തമാക്കി. ഇവരുടെ ഖബറടക്കം സിത്രയിലെ അല്‍ ഖര്‍ജിയ ഖബറിസ്ഥാനില്‍ നടന്നു. ബന്ധുക്കള്‍ക്കൊപ്പം സര്‍ക്കാര്‍ പ്രതിനിധികളും നേതാക്കളും ചടങ്ങില്‍ പങ്കെടുത്തു.

സ്‌കൂള്‍ വെക്കേഷന്‍ സമയമായതിനാല്‍ വ്യാഴാഴ്ച രാത്രി ആലി പ്രവിശ്യയിലെ സ്വന്തം വീട്ടില്‍ നിന്നും സിത്രയിലെ കുടുംബ വീട്ടിലേക്ക് തന്റെ മൂന്നു മക്കളോടൊപ്പം കാറില്‍ സഞ്ചരിക്കവേയാണ് ഈസ്റ്റ് എക്കറില്‍ വെച്ച് ബോംബ് സ്‌ഫോടനം നടന്നത്. വന്‍ ശബ്ദത്തോടെ ബോംബ് പൊട്ടിത്തെറിച്ചപ്പോള്‍ സമീപമുണ്ടായിരുന്ന കാറിലേയ്ക്ക് ചീളുകള്‍ തെറിച്ച് വീണതാകാമെന്നാണ് കരുതപ്പെടുന്നത്. ഇതു മൂലമുണ്ടായ ഗുരുതര പരിക്കാണ് ഫഖ് രിയ യുടെ മരണകാരണമെന്നാണ് പ്രാഥമിക നിഗമനം. ക്യാപ്പിറ്റല്‍ ഗവര്‍ണറേറ്റ് പൊലിസ് ഉദ്യോഗസ്ഥരും ഈ നിഗമനത്തെ ശരിവെച്ചിട്ടുണ്ട്. സംഭവത്തില്‍ സാരമായി പരിക്കേറ്റ മൂന്നു കുട്ടികളെയും ആശുപത്രിയില്‍ പ്രവേശിപ്പിച്ചു.