തളിപ്പറമ്പ് എം.എല്‍.എയുടെ നേതൃത്വത്തില്‍ ജനപങ്കാളിത്തത്തോടെ പുതിയ പദ്ധതി
തളിപ്പറമ്പ്: തളിപ്പറമ്പില്‍ ജനകീയ വികസന സമിതിയുടെ മാതൃകയില്‍ മണ്ഡലത്തിലെ മുഴുവന്‍ റോഡുകളുടെയും സംരക്ഷണത്തിന് ജയിംസ് മാത്യു എം.എല്‍.എയുടെ മേല്‍നോട്ടത്തില്‍ സ്ഥിരം സമിതി രൂപീകരിക്കുന്നു.
തളിപ്പറമ്പ് നിയോജക മണ്ഡലത്തിലൂടെ കടന്നുപോകുന്ന നാഷണല്‍ ഹൈവേയുടെയും പൊതുമരാമത്ത് വകുപ്പ്, തദ്ദേശ സ്വയംഭരണ സ്ഥാപനങ്ങള്‍ എന്നിവയുടെയും പരിധിയില്‍ വരുന്ന റോഡുകളുടെ സംരക്ഷണമാണ് സമിതിയുടെ മേല്‍നോട്ടത്തില്‍ സംരക്ഷിക്കുക. പൊതുമരാമത്ത് വകുപ്പിന്റെ സഹകരണത്തോടെ ജൂലൈ ആറ് മുതല്‍ റോഡ് സംരക്ഷണപ്രവര്‍ത്തനങ്ങള്‍ ആരംഭിക്കും. റോഡിന് ഇരുവശത്തുമുള്ള ഡ്രെയിനേജുകള്‍ മണ്ണ് വന്നു നിറയുന്നതും വീടുകളിലും കടകളിലും കയറുന്നതിനു വേണ്ടി ആളുകള്‍ മണ്ണിട്ടു നിറക്കുന്നതും ബന്ധപ്പെട്ട എഞ്ചിനീയറിംഗ് വിഭാഗത്തിന്റെ സഹായത്തോടു കൂടി നീക്കം ചെയ്യുക, മഴക്കാലത്തുണ്ടാകുന്ന ചെറിയ കുഴികള്‍ ഇന്‍സ്റ്റന്റ് റോഡ് റിപ്പയറിംഗ് മിക്‌സ് ഉപയോഗിച്ച് വളരെ പെട്ടെന്ന് അടക്കുക തുടങ്ങിയ പ്രവര്‍ത്തനങ്ങളിലൂടെ റോഡുകള്‍ സ്ഥിരമായി സംരക്ഷിക്കാനാണ് ഉദ്ദേശിക്കുന്നത്. ഇതിനായി 100 ചാക്കോളം റോഡ് ബോണ്ട് തളിപ്പറമ്പില്‍ എത്തിക്കഴിഞ്ഞു. ഒരു മണിക്കൂര്‍ കൊണ്ട് പൂര്‍ണമായും സെറ്റാകുമെന്നതാണ് റോഡ് ബോണ്ടിന്റെ പ്രത്യേകത.
ജനകീയ സമിതികള്‍ രൂപീകരിച്ച് സംരക്ഷിക്കുന്ന റോഡുകളില്‍ ബോര്‍ഡ് സ്ഥാപിച്ച് സംരക്ഷണ പ്രവര്‍ത്തനത്തിന് ജനങ്ങളുടെ പിന്തുണതേടും. റോഡുകള്‍ക്ക് കേടുപാട് പറ്റുന്നത് ശ്രദ്ധയില്‍പെട്ടാല്‍ ജനങ്ങള്‍ക്ക് അറിയിക്കാന്‍ സാധിക്കുന്ന ഫോണ്‍ നമ്പര്‍ രേഖപ്പെടുത്തും. വിവരം ലഭിച്ചാല്‍ കേടുപാടുകള്‍ തീര്‍ക്കാന്‍ അടിയന്തിരമായും ഇടപെടും.
അടുത്ത വര്‍ഷമാകുന്നതോടെ തളിപ്പറമ്പില്‍ കുണ്ടുംകുഴിയുമില്ലാത്ത റോഡാക്കുകയാണ് പദ്ധതിയുടെ ലക്ഷ്യമെന്നും സംസ്ഥാനത്ത് ആദ്യമായാണ് ഒരുമണ്ഡലത്തില്‍ ഇത്തരം പദ്ധതി തയാറാക്കുന്നതെന്നും എം.എല്‍.എ പറഞ്ഞു.
വാര്‍ത്താസമ്മേളനത്തില്‍ ജയിംസ് മാത്യു എം.എല്‍.എ, തളിപ്പറമ്പ് നഗരസഭാ ചെയര്‍മാന്‍ അള്ളാംകുളം മഹമൂദ്, ആന്തൂര്‍ നഗരസഭാ ചെയര്‍പേഴ്‌സണ്‍ പി.കെ ശ്യാമള ടീച്ചര്‍, പഞ്ചായത്ത് പ്രസിഡന്റുമാരായ സജി ഓതറ, ഐ.വി.നാരായണന്‍, എ രാജേഷ്, പി ബാലന്‍, എന്‍ പത്മനാഭന്‍, കെ.സി.പി ഫൗസിയ, പി.ഡബ്ല്യു.ഡി റോഡ് വിഭാഗം അസി.എക്‌സിക്യുട്ടീവ് എഞ്ചിനീയര്‍ കെ ദിവാകരന്‍ പങ്കെടുത്തു.