കണ്ണൂര്‍: ജില്ലയില്‍ വയറിളക്കരോഗങ്ങള്‍ ഗണ്യമായി വര്‍ധിച്ച സാഹചര്യത്തില്‍ പൊതുജനങ്ങളും ഭക്ഷ്യവില്പന, വിതരണകേന്ദ്രങ്ങളും ജാഗ്രത പാലിക്കണമെന്ന് ഡി.എം.ഒ യുടെ നിര്‍ദേശം. ഭക്ഷണ വില്‍പനശാലകളില്‍ നന്നായി തിളപ്പിച്ച വെള്ളം മാത്രമേ കുടിക്കുന്നതിന് നല്‍കാന്‍ പാടുള്ളൂ. വാഷ് ബേസിനുകള്‍ക്കു സമീപം സോപ്പോ ഹാന്‍ഡ്‌വാഷിങ്ങ് ലോഷനോ നിര്‍ബന്ധമായും വെച്ചിരിക്കണം. പഴകിയ ഭക്ഷണസാധനങ്ങള്‍ ഉപയോഗിക്കരുതെന്ന് ഡി.എം.ഒയുടെ നിര്‍ദേശത്തില്‍ പറയുന്നു. കുടിവെള്ളവും ആഹാരസാധനങ്ങളും എപ്പോഴും അടച്ചു സൂക്ഷിക്കണം. കിണറ്റിലെ ജലം മലിനപ്പെടാതെ സൂക്ഷിക്കുകയും ഇടക്കിടെ കിണര്‍ വെള്ളം ക്ലോറിനേറ്റ് ചെയ്യുകയും വേണം. വയറിളക്കമുണ്ടായാല്‍ പാനീയ ചികിത്സ (ഒ.ആര്‍.എസ് ലായനി) നല്‍കുക. ഉപ്പിട്ട കഞ്ഞിവെള്ളം, കരിക്കിന്‍ വെള്ളം, ഉപ്പും പഞ്ചസാരയും ചേര്‍ത്ത നാരങ്ങാവെള്ളം, ഉപ്പിട്ട മോരിന്‍ വെള്ളം തുടങ്ങിയ ഗൃഹപാനീയങ്ങളും നല്‍കാം.