കൊപ്പം: രാഷ്ട്രീയ പ്രവര്‍ത്തനം പ്രകടന പരതക്കും സ്വന്തക്കാര്‍ക്കും വേണ്ടി വഴിമാറുന്ന ഇക്കാലത്ത് വിളയൂര്‍ പഞ്ചായത്ത് രണ്ടാം വാര്‍ഡ് മെമ്പര്‍ പാലൊളി അബ്ദുറഹ്മാന്‍ എന്ന നാട്ടുകാരുടെ അബ്ദുട്ടി വ്യത്യസ്തനാവുകയാണ്. പാലൊളിക്കുളമ്പ് സ്വദേശിയായ ആറ്റത്തൊടി ഖദീജുവിന്റെ വര്‍ഷങ്ങളായുള്ള സ്വപ്നങ്ങളുടെ സാക്ഷാല്‍ക്കാരമായിരുന്നു കഴിഞ്ഞ ദിവസം.
ഓരോ തെരഞ്ഞെടപ്പ് വരുമ്പോഴും വോട്ട് തേടി വരുന്ന സ്ഥാനാര്‍ത്ഥികളോടും പാര്‍ട്ടിക്കാരോടും വെള്ളവും വെളിച്ചവുമെന്ന തന്റെ എക്കാലത്തെയും ആവശ്യം ഖദീജാത്ത അറിയിക്കും. കഴിഞ്ഞ പഞ്ചായത്ത് തെരഞ്ഞടുപ്പില്‍ വോട്ട് തേടിയെത്തിയ നാട്ടുകാരന്‍ അബ്ദുട്ടിയോടും കദീജ തന്റെ വേദന പങ്കുവെച്ചു. തെരഞ്ഞടുപ്പില്‍ അബ്ദുറഹ്മാന്‍ ജയിച്ചു. ഖദീജയുടെ സ്വപ്നവും സാക്ഷാല്‍ക്കാരമായി. പൈപ്പില്‍കൂടി വെള്ളം ചാടുന്നതും വീട്ടില്‍ ബള്‍ബ് കത്തുന്നതും കണ്ട് കദീജയുടെ കണ്ണുകളില്‍ ആനന്ദാശ്രുക്കള്‍ ഒഴുകി. സുന്നി മഹല്ല് ഫെഡറേഷന്റെയും, സുന്നി യുവജന സംഘത്തിന്റെയും വിളയൂര്‍ പഞ്ചായത്ത് ഭാരവാഹിയും, പഞ്ചായത്ത് മുസ്‌ലിം ലീഗ് വൈസ് പ്രസിഡന്റുമാണ് പാലൊളി അബ്ദുറഹ്മാന്‍.