കുന്നംകുളം: താലൂക്ക് ആശുപത്രിയില്‍ ആവശ്യത്തിന് ഡോക്ടര്‍മാരില്ലാത്തതിനാല്‍ രോഗികള്‍ വലയുന്നു. ദിനംപ്രതി നൂറുകണക്കിന് രോഗികളെത്തുന്ന കുന്നംകുളം താലൂക്ക് ആശുപത്രിയിലാണ് ആവശ്യത്തിന് ഡോക്ടര്‍മാരില്ലാത്തത് കാരണം രോഗികള്‍ പ്രയാസത്തിലായിരിക്കുന്നത്.
13 ഡോക്ടര്‍മാരുടെ സേവനം ലഭിക്കേണ്ടയിടത്ത് വെറും നാലു ഡോക്ടര്‍മാരാണ് ഇവിടെയുള്ളത്. രാവിലെ മുതല്‍ പരിശോധനയ്ക്ക് എത്തുന്ന രോഗികള്‍ മണിക്കൂറുകളോളം ക്യൂവില്‍ നിന്നാണ് പലപ്പോഴും ഡോക്ടര്‍മാരെ കാണുന്നത്. പലരും ഡോക്ടര്‍മാരെ കാണാന്‍ കഴിയാതെ മടങ്ങിപ്പോകുന്നുമുണ്ട്. ആവശ്യത്തിന് ഡോക്ടര്‍മാരെ നിയമിക്കണമെന്നാവശ്യപ്പെട്ട് ഡി.എം.ഒക്ക് നിരവധി തവണ പരാതി നല്‍കിയിരുന്നെങ്കിലും യാതൊരു ഫലവും ഉണ്ടായിട്ടില്ല.
എത്രയും പെട്ടെന്ന് ആവശ്യത്തിന് ഡോക്ടര്‍മാരെ നിയമിച്ച് രോഗികളുടെ ദുരിതം അവസാനിപ്പിക്കാന്‍ അധികൃതരുടെ ഭാഗത്ത് നിന്ന് നടപടിയുണ്ടായില്ലെങ്കില്‍ നിരാഹാരസമരം ആരംഭിക്കുമെന്ന് ജീവകാരുണ്യ പ്രവര്‍ത്തകനായ സോമന്‍പിള്ള പറഞ്ഞു. മന്ത്രി എ.സി മൊയ്തീന്‍ ഇടപെട്ട് പ്രശ്‌നത്തില്‍ പരിഹാരം കാണണമെന്നും സോമന്‍ പിള്ള ആവശ്യപ്പെട്ടു.