കരൂപ്പടന്ന: വീടുകളില്‍ ഉപയോഗിക്കാതെ വച്ചിരിക്കുന്ന ഉപയോഗ്യമായ സൈക്കിളുകള്‍ ശേഖരിച്ച് നിര്‍ധന വിദ്യാര്‍ഥികള്‍ക്ക് വിതരണം ചെയ്യാന്‍ വാട്‌സ്ആപ് കൂട്ടായ്മ രംഗത്ത്. കരൂപ്പടന്ന കൂട്ടം വാട്‌സ്ആപ് ഗ്രൂപ്പ് അംഗങ്ങളും കരൂപ്പടന്ന പള്ളി നട പൗരസമിതി അംഗങ്ങളുമായ സിദ്ദീഖ് പോട്ടത്ത്, ശിഹാബ് അറക്കല്‍, ഹമീദ് എടപ്പുള്ളി, വി.എച്ച് ശിഹാബ് എന്നിവരാണ് സൈക്കിള്‍ ശേഖരണ പദ്ധതിയുമായി മുന്നിട്ടിറങ്ങിയിരിക്കുന്നത്. വാട്‌സ്ആപ് ഗ്രൂപ്പ് വഴി പദ്ധതിയെ കുറിച്ചറിഞ്ഞ് നിരവധി പേര്‍ സൈക്കിള്‍ നല്‍കാന്‍ തയാറായിട്ടുണ്ട്. കുട്ടികള്‍ വലുതായതിനാലും പഠനാവശ്യാര്‍ഥം പുറത്തു പോയതിനാലും മറ്റും ഉപയോഗമില്ലാതെ കിടക്കുന്ന ചെറുതും വലുതുമായ സൈക്കിളുകളാണ് പ്രധാനമായും ശേഖരിക്കുന്നത്.