എളേറ്റില്‍: പരിമിത വരുമാനമാണെങ്കിലും കോളിക്കല്‍ വട്ടിക്കുന്നുമ്മല്‍ അഷ്‌റഫ് പഠന പ്രോത്സാഹനത്തിന് വേറിട്ട മാതൃകയാകുന്നു. കോളിക്കലില്‍ 'ചക്കര' ഫര്‍ണിച്ചര്‍ നടത്തിവരുന്ന അഷ്‌റഫ് കഴിഞ്ഞ പതിനേഴ് വര്‍ഷമായി തന്റെ വരുമാനത്തിന്റെ ഒരു വിഹിതം റിലീഫ് പ്രവര്‍ത്തനത്തിന് നീക്കി വയ്ക്കുന്നത് പതിവാക്കിയിരിക്കുകയാണ്.
മുഖ്യമായും പഠന ഉപകരണങ്ങള്‍ നല്‍കുന്നതിനാണ് വിനിയോഗിക്കാറ്. എല്ലാ വര്‍ഷവും എസ്.എസ്.എല്‍.സി, പ്ലസ്ടു പരീക്ഷയില്‍ ഉന്നതവിജയം നേടുന്ന പ്രദേശത്തെ വിദ്യാഥികള്‍, ജാതി, മത ഭേതമന്യേ അനുമോദിക്കുകയും പ്രദേശത്തെ അന്‍പതോളം വിദ്യാര്‍ഥികള്‍ക്ക് എല്ലാ വര്‍ഷവും നോട്ട് ബുക്ക്, കുട, ബാഗ് തുടങ്ങിയ പഠന ഉപകരണങ്ങളും വിതരണം ചെയ്യാറുണ്ട്. പൂനൂര്‍ കോളിക്കല്‍ പ്രദേശത്തെ മത, സാമൂഹിക, സാംസ്‌കാരിക രംഗത്തെ സജീവ സാന്നിധ്യമായ അഷ്‌റഫ് 'സമസ്ത'യുടെ സജീവ പ്രവര്‍ത്തകനും, എസ്.വൈ.എസ് കട്ടിപ്പാറ പഞ്ചായത്ത് വൈ. പ്രസിഡന്റ്, പൂനൂര്‍ ആസ്ഥാനമായി പ്രവര്‍ത്തിക്കുന്ന ഇസ്‌ലാമിക് സെന്റര്‍ സെക്രട്ടറി തുടങ്ങിയ സ്ഥാനങ്ങളും വഹിച്ചുവരുന്നു. ഈ വര്‍ഷത്തെ വിദ്യാഭ്യാസ പ്രോത്സാഹന പരിപാടി ഉദ്ഘാടനം ഹസന്‍ ദാരിമി വവാട് നിര്‍വഹിച്ചു.
കോളിക്കല്‍ അങ്ങാടിയില്‍ വച്ച് നടന്ന ചടങ്ങില്‍ എം.പി ആലി ഹാജി അധ്യക്ഷനായി. പി.സി അസയിനാര്‍, ഷാജി മയൂരാസ്, നിസാര്‍ കട്ടിപ്പാറ, മൊയത്ത് മുഹമ്മദ്, വാര്‍ഡ് മെംബര്‍ ഷാഹിം ഹാജി, കെ.ടി രിഫായത്ത്, പി.സി മുഹമ്മദ്, വി.ടി അഷ്‌റഫ്, മൂസ, ഇഖ്ബാല്‍ മാസ്റ്റര്‍ സംബന്ധിച്ചു.