വാഷിങ്ടണ്‍: കൊവിഡ്-19 ബാധിച്ച് ലോകത്താകെ മരിച്ചവരുടെ എണ്ണം 70,659 ആയി. 12,91,313 പേര്‍ക്കാണ് രോഗം സ്ഥിരീകരിച്ചിരിക്കുന്നത്. 2,72,235 പേരാണ് രോഗവിമുക്തരായത്. ഇറ്റലിയിലും സ്‌പെയിനിലും മരണസംഖ്യ പതിനായിരം കടന്നതിനു പുറമേ, അമേരിക്കയിലും മരണസംഖ്യ പതിനായിരത്തോട് അടുത്തിട്ടുണ്ട്.

എന്നാല്‍, ലോകത്താകെ കൊവിഡ് ബാധിച്ച് 64,471 പേര്‍ മരിച്ചതായാണ് ഐക്യരാഷ്ട്രസഭ ഔദ്യോഗികമായി വ്യക്തമാക്കുന്നത്. ഔദ്യോഗിക കണക്കനുസരിച്ച് 11,74,855 പേര്‍ക്കാണ് രോഗം സ്ഥിരീകരിച്ചിരിക്കുന്നത്.

അതിനിടെ, ബ്രിട്ടണിലും കൊവിഡ്-19 വ്യാപകമായി പടരുകയാണ്. ഇന്നത്തോടെ മരണം 5000 കടന്നു. ഇന്ന് 439 പേര്‍ കൂടി മരിച്ചതോടെ മരണസംഖ്യ 5,373 ആയി ഉയര്‍ന്നു.

തുര്‍ക്കിയില്‍ മരണസംഖ്യ 649 ആയി ഉയര്‍ന്നു. 30,217 പേര്‍ക്കാണ് ഇതുവരെ കൊവിഡ്-19 സ്ഥിരീകരിച്ചത്.

ന്യൂയോര്‍ക്കില്‍ ലോക്ക്ഡൗണ്‍ ഏപ്രില്‍ 29 വരെ നീട്ടി.

ഇറ്റലിയില്‍ മരണസംഖ്യാനുപാതം കുറഞ്ഞുവരുന്നു. കഴിഞ്ഞ ദിവസങ്ങളില്‍ റിപ്പോര്‍ട്ട് ചെയ്തതില്‍ നിന്ന് നല്ല തോതില്‍ ഇടിവുണ്ടായിട്ടുണ്ട്. എന്നാല്‍ ഇന്ന് ചെറിയ വര്‍ധനയുണ്ടായി.് 636 പേരാണ് ഇറ്റലിയില്‍ മരിച്ചത്. നേരത്തെ ആയിരത്തിനടുത്ത് ആളുകള്‍ മരിച്ച ദിവസങ്ങളുണ്ടായിരുന്നു.