തിരൂരങ്ങാടി: ഖത്തര്‍ ഫൗണ്ടേഷനുകീഴിലുള്ള ഖത്തര്‍ ഡിബേറ്റ് സെന്റര്‍ സംഘടിപ്പിക്കുന്ന നാലാമത് രാജ്യാന്തര അറബിക് ഡിബേറ്റ് ചാംപ്യന്‍ഷില്‍ ദാറുല്‍ഹുദാ ഇസ്‌ലാമിക് സര്‍വകലാശാലയെ നാലംഗ ടീം പ്രതിനിധീകരിക്കും.
ഡിഗ്രി അവസാന വര്‍ഷ വിദ്യാര്‍ഥിയായ ഖമറുല്‍ഫാരിസ് പൂക്കിപ്പറമ്പ്, രണ്ടാംവര്‍ഷ വിദ്യാര്‍ഥികളായ മുഹമ്മദ് മുസ്തഫ പൂനൂര്‍, ആശിഖുര്‍ റഹ്മാന്‍ കാളികാവ്, ഡിഗ്രി ഒന്നാം വര്‍ഷ വിദ്യാര്‍ഥി മുഹമ്മദ് ചേലക്കാട് എന്നിവരാണ് ദാറുല്‍ഹുദാ ടീമിനെ പ്രതിനിധീകരിക്കുക.
ഏപ്രില്‍ 7 മുതല്‍ 12 വരെ ദോഹയില്‍ നടക്കുന്ന രാജ്യാന്തര മത്സരത്തില്‍ 83 രാജ്യങ്ങളില്‍ നിന്നായി ഇരുന്നൂറോളം സര്‍വകലാശാലകളാണ് മാറ്റുരക്കുന്നത്. ഡിബേറ്റ് പരിശീലകനായി ഡിഗ്രി വിഭാഗം ലക്ചറര്‍ ഇസ്ഹാഖ് ഹുദവി ചങ്ങരംകുളവും ദാറുല്‍ഹുദാ ടീമിനെ അനുഗമിക്കുന്നുണ്ട്. പരിശീലകര്‍ക്കായി ജനുവരിയില്‍ ഒരാഴ്ചത്തെ പ്രത്യേക ട്രെയ്‌നിങ് ക്യാംപ് ദോഹയില്‍ സംഘടിപ്പിച്ചിരുന്നു. ദാറുല്‍ഹുദാ നാമനിര്‍ദേശം ചെയ്തതനുസരിച്ച് കാലിക്കറ്റ് യൂനിവേഴ്‌സിറ്റിയും ഇത്തവണ ഇന്ത്യയില്‍ നിന്ന് പങ്കെടുക്കുന്നുണ്ട്.
കാലിക്കറ്റ് ടീമിലും വിദൂരവിദ്യാഭ്യാസ വിഭാഗം പഠിതാക്കളായ ദാറുല്‍ഹുദായിലെ രണ്ട് പി.ജി വിദ്യാര്‍ഥികളാണ് മാറ്റുരക്കുന്നത്. ദാറുല്‍ഹുദാ സംഘം ആറിന് ദോഹയിലെത്തും.