കൊണ്ടോട്ടി: കരിപ്പൂര്‍ വിമാനത്താവളത്തില്‍ നിന്ന് 13.4 ലക്ഷത്തിന്റെ സ്വര്‍ണവും കുങ്കുമപ്പൂവും പിടികൂടി.
ഇന്നലെ രാവിലെ 8.30ന് ദുബൈയില്‍ നിന്നെത്തിയ എയര്‍ ഇന്ത്യ എക്‌സ്പ്രസിലാണ് തലശ്ശേരി സ്വദേശിയില്‍ നിന്ന് 116 ഗ്രാം സ്വര്‍ണവും എട്ടു കിലോ കുങ്കുമപ്പൂവും പിടിച്ചെടുത്തത്.
ഇയാളുടെ ലഗേജ് ബാഗിനുളളില്‍ പ്രത്യേക അറകളിലായിട്ടായിരുന്നു 10 ലക്ഷം രൂപ വിലവരുന്ന കുങ്കുമപ്പൂവ് സൂക്ഷിച്ചിരുന്നത്.
സുഗന്ധ ലേപനത്തിനുളളിലായിരുന്നു 3.4 ലക്ഷം രൂപ വിലവരുന്ന സ്വര്‍ണം ഒളിപ്പിച്ചിരുന്നത്. പിടിയിലായ യാത്രക്കാരനെ ചോദ്യം ചെയ്തു വരികയാണ്.
കരിപ്പൂരില്‍ നിന്ന് സുഗന്ധദ്രവ്യ കുപ്പിക്കുളളില്‍ ഒളിപ്പിച്ചു കടത്തിയ 349 ഗ്രാം സ്വര്‍ണം കഴിഞ്ഞ ദിവസം കസ്റ്റംസ് ഇന്റലിജന്‍സ് പിടികൂടിയിരുന്നു.