തിരുവന്തപുരം: അധ്യാപകരുടെ സര്‍ഗാത്മക രചനകള്‍ വിദ്യാര്‍ഥികള്‍ക്ക് പ്രചോദനമേകുമെന്ന് വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് അഭിപ്രായപ്പെട്ടു.
വായനാവാരത്തോടനുബന്ധിച്ച് തിരുവനന്തപുരം മണക്കാട് ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂളില്‍ വായനയ്ക്ക് ഒരു മണിക്കൂര്‍ എന്ന പരിപാടിയുടെ സംസ്ഥാനതല ഉദ്ഘാടനവും കോഴിക്കോട് പെരിങ്ങളം ഗവ. ഹയര്‍ സെക്കന്‍ഡറി സ്‌കൂള്‍ അധ്യാപിക രശ്മി മധുവന്തിയുടെ'സുസ്മിത പരിധിക്ക് പുറത്താണ്'എന്ന കഥാസമാഹാരത്തിന്റെ പ്രകാശനവും നിര്‍വഹിച്ചു സംസാരിക്കുകയായിരുന്നു മന്ത്രി. മുന്‍മന്ത്രി വി.എസ് ശിവകുമാര്‍ ആദ്യപ്രതി ഏറ്റുവാങ്ങി. കേരളത്തിലെ ആദ്യത്തെ വിദ്യാഭ്യാസ മന്ത്രി പ്രൊഫ. ജോസഫ് മുണ്ടണ്ടശ്ശേരി ഈ വഴിയില്‍ അധ്യാപകര്‍ക്ക് ഒരു മാതൃകയായിരുന്നെന്നും മന്ത്രി പറഞ്ഞു. നവമധ്യമങ്ങളുടെ എല്ലാ നല്ലവശങ്ങളും ഉള്‍ക്കൊണ്ട് വായനയും എഴുത്തും സ്‌കൂള്‍ കോളജ് കാംപസുകളില്‍ സജീവമാകണം. അതിനു കൂടുതല്‍ വായിക്കുകയും എഴുതുകയും ചെയ്യുന്ന അധ്യാപക സമൂഹം ഉയര്‍ന്നുവരേണ്ടണ്ടത് കാലഘട്ടത്തിന്റെ ആവശ്യമായി മാറിയിരിക്കുന്നുവെന്നും മന്ത്രി ചൂണ്ടണ്ടിക്കാട്ടി.
മുന്‍മന്ത്രി വി.എസ് ശിവകുമാറിന്റെ അധ്യക്ഷതയില്‍ ചേര്‍ന്ന യോഗത്തില്‍ തിരുവനന്തപുരം ജില്ലാ ഇന്‍ഫര്‍മേഷന്‍ ഓഫിസര്‍ കെ. സുരേഷ് കുമാര്‍, വിക്‌ടേര്‍സ് ചാലനല്‍ മേധാവി ശ്രീ. സലിന്‍ മാങ്കുഴി, എസ്.എസ്.എ പ്രൊജക്ട് ഓഫിസര്‍ എം. രാജേഷ്, കഥാകൃത്ത് കെ.കെ പല്ലശ്ശന, കാര്‍ട്ടൂണിസ്റ്റ് ഹക്കു, പ്രസാധകന്‍ ബിന്നി സാഹിതി തുടങ്ങിയവര്‍ സംസാരിച്ചു.