കാസര്‍കോട്: 'ഓണത്തിന് ഒരു മുറം പച്ചക്കറി' പദ്ധതിയുടെ ഭാഗമായി കാര്‍ഷിക വികസന കര്‍ഷക ക്ഷേമ വകുപ്പ് വിഷരഹിതമായ പച്ചക്കറി വീട്ടുവളപ്പില്‍ തന്നെ ലഭ്യമാക്കാന്‍ ലക്ഷ്യമിട്ട് അഞ്ചുതരം പച്ചക്കറി വിത്തുകള്‍ അടങ്ങിയ പാക്കറ്റ് ജില്ലയിലെ 1,80,000 വിദ്യാര്‍ഥികള്‍ക്ക് സൗജന്യമായി വിതരണം ചെയ്തു. ഗവണ്‍മെന്റ്, എയ്ഡഡ്, അണ്‍എയ്ഡഡ് സ്‌കൂളുകളിലെ മുഴുവന്‍ വിദ്യാര്‍ഥികള്‍ക്കുമാണ് വിത്ത്പാക്കറ്റുകള്‍ വിതരണം ചെയ്തത്. ഇതോടൊപ്പം ഹരിതകേരളം പദ്ധതിയുടെ ഭാഗമായി ജില്ലയില്‍ സര്‍ക്കാര്‍ ഫാമുകളില്‍ ഉല്‍പാദിപ്പിച്ച വൃക്ഷത്തൈകളും വിതരണം ചെയ്തു.
വിദ്യാര്‍ഥികള്‍ക്കായുള്ള പച്ചക്കറി വിത്ത് വിതരണത്തിന്റെ ജില്ലാതല ഉദ്ഘാടനം ചെര്‍ക്കള ജി.എച്ച്.എസ്.എസില്‍ നടന്ന ചടങ്ങില്‍ കൃഷി ഡെപ്യൂട്ടി ഡയറക്ടര്‍ സജിനിമോള്‍, സ്‌കൂള്‍ പ്രധാനധ്യാപകന്‍ ചന്ദ്രശേഖരന്‍ നായര്‍ എന്നിവര്‍ ചേര്‍ന്നു നിര്‍വഹിച്ചു. സ്‌കൂള്‍ പി.ടി.എ വൈസ് പ്രസിഡന്റ് മുഹമ്മദ് കുഞ്ഞി അധ്യക്ഷനായി. കൃഷി ഡെപ്യൂട്ടി ഡയറക്ടര്‍ മേരി ജോര്‍ജ്, സുഷമ എന്നിവര്‍ പരിസ്ഥിതി ദിനവുമായി ബന്ധപ്പെട്ട് വൃക്ഷത്തൈകളുടെ വിതരണം നിര്‍വഹിച്ചു. കൃഷി അസി. ഡയരക്ടര്‍ എം.വി കൃഷ്ണസ്വാമി, ചെര്‍ക്കള ജി.എച്ച്.എസ്.എസ് സീനിയര്‍ അസിസ്റ്റന്റ് ടി.എ സമീര്‍, ഷീന, ജോസ് മാത്യു, കൃഷി ഓഫിസര്‍ അതുല്യ എസ്. കുമാര്‍, സ്‌കൂള്‍ സ്റ്റാഫ് സെക്രട്ടറി ഗിരിജാ കുമാരി എന്നിവര്‍ സംസാരിച്ചു