ജിദ്ദ: കൊറോണ വൈറസ് ബാധയെ പ്രതിരോധിക്കാൻ സഊദിയിൽ സമ്പൂർണ്ണ കർഫ്യൂ പ്രഖ്യാപിക്കുന്നതിന്റെ മുമ്പ് തന്നെ തൊഴിലും ശമ്പളവുമില്ലാതെ ദിവസങ്ങളായി ഭക്ഷണത്തിന് പ്രയാസപെടുന്ന പാവപെട്ട പ്രവാസി തൊഴിലാളികളെ കണ്ടെത്തി അവർക്ക് രണ്ടാഴ്ച കാലത്തേക്ക് ആവശ്യമായ ഭക്ഷ്യധാന്യങ്ങൾ എത്തിച്ച് കൊടുത്ത ജിദ്ദ കെഎംസിസി സെൻട്രൽ കമ്മിറ്റിയുടെ സേവനം നൂറ് കണക്കിന് പാവപെട്ട പ്രവാസികൾക്ക് അനുഗ്രഹമായി.  സെൻട്രൽ കമ്മിറ്റിയുടെ 73 ഏരിയ കമ്മിറ്റികളാണ് സഹായത്തിനർഹരായ ഗുണഭോക്താക്കളെ കണ്ടെത്തിയത്. കെഎംസിസി ആസ്ഥാനത്തു കെഎംസിസി വളണ്ടിയർ വിങ്‌ഗാണ് അവശ്യ സാധനങ്ങൾ കിറ്റ്കളാക്കി തയ്യാറാക്കുന്നത്.       

        അനുവദനീയമായ സാധ്യതകൾ ഉപയോഗപ്പെടുത്തി വരും ദിവസങ്ങളിലും അർഹരായ ആളുകൾക്ക് സാധനങ്ങൾ എത്തിച്ച് നൽകുമെന്ന് ജിദ്ദ കെഎംസിസി പ്രസിഡന്റ് അഹമ്മദ് പാളയാട്ടും ജനറൽ സെക്രട്ടറി അബൂബക്കർ അരിമ്പ്രയും അറിയിച്ചു. ഇതിനു പുറമെ ഡോക്ടർമാരും പാരാമെഡിക്കൽ സ്റ്റാഫും അടങ്ങുന്ന വിപുലമായ മെഡിക്കൽ ഹെൽപ് ഡസ്കും പ്രവർത്തിച്ച് വരുന്നുണ്ട്.

       ജിദ്ദയിലെ നിത്യ രോഗികളായ ആളുകൾക്ക് ഓൺലൈനിൽ വേണ്ട നിർദേശങ്ങൾ നൽകാനും,  ദിനേന കഴിക്കുന്ന അത്യാവശ്യ  മരുന്നുകൾ ലഭ്യമാക്കുക,  ചെറിയ രോഗങ്ങൾക്ക് വേണ്ട ചികിത്സ ലഭ്യമാക്കുക തുടങ്ങി നിയന്ത്രണ സമയങ്ങളിൽ രോഗികളെ സഹായിക്കാൻ അൽ റയാൻ ഇന്റർ നാഷണൽ ക്ലിനിക്കുമായി സഹകരിച്ചു ഡോ:ദിനേശിന്റെ നേതൃത്വത്തിൽ ഹെൽപ് ലൈൻ പ്രവർത്തിക്കുന്നുണ്ട്.