മാള: ഐരാണിക്കുളം ഗവണ്‍മെന്റ് ഹയര്‍ സെക്കന്‍ഡറി സ്‌കൂളിലെ തകര്‍ച്ചാ ഭീഷണിയുള്ള കെട്ടിടങ്ങള്‍ ഇനിയും പൊളിച്ചു മാറ്റാത്തതില്‍ പ്രതിഷേധം.
മഴക്കാലം കൂടിയായതോടെ കുട്ടികള്‍ക്ക് ജീര്‍ണ്ണാവസ്ഥയിലുള്ള ഈ കെട്ടിടങ്ങള്‍ ഏറെ ഭീഷണി സൃഷ്ടിക്കുകയാണ്.
ഒരു കെട്ടിടം പഴയ ക്ലാസ് മുറികളുടേതാണ്. നൂറ്റാണ്ട് പിന്നിട്ട സ്‌കൂളിന്റെ ആരംഭ കാലത്ത് പണിത കെട്ടിടമാണിത്.
കെട്ടിടം ഉപയോഗശൂന്യമായിട്ട് വര്‍ഷങ്ങളേറെയായി.
ഓട് മേഞ്ഞ കെട്ടിടത്തിന്റെ ഓടുകളില്‍ പലതും പൊട്ടി തകര്‍ന്നിട്ടുണ്ട്. പലതും താഴെ വീണുകൊണ്ടിരിക്കുകയാണ്. കഴുക്കോലുകളിലും പട്ടികകളിലും പലതും ചിതലരിച്ചും ജീര്‍ണ്ണിച്ചും നശിച്ചിരിക്കയാണ്.
മറ്റൊരു കെട്ടിടം സ്റ്റേജാണ്. മേല്‍ക്കൂര കോണ്‍ഗ്രീറ്റ് ചെയ്ത ഈ കെട്ടിടം ഉപയോഗിക്കാതെയായിട്ട് ആറ് വര്‍ഷത്തിലേറെയായി. കോണ്‍ഗ്രീറ്റ് പലയിടങ്ങളിലായി അടര്‍ന്നിരിക്കുകയാണ്. പലയിടങ്ങളിലായി അടര്‍ന്ന് താഴെ വീഴാകുന്ന അവസ്ഥയിലാണ് കോണ്‍ഗ്രീറ്റ്.
കുട്ടികള്‍ സ്റ്റേജിന് മുകളിലേക്ക് കയറി അപകടം സംഭവിക്കാതിരിക്കാനായി ഇവിടെ പഴയ ഓടുകള്‍ അടുക്കി വച്ചിരിക്കുകയാണ്. പഴയ ശുചിമുറികളാണ് മറ്റൊരു കെട്ടിടം. കാട് പിടിച്ച് കിടക്കുന്ന ഇവിടെ ഇഴജന്തുക്കളുണ്ടാകാന്‍ സാധ്യതയുണ്ട്. ക്ലാസിന് പുറത്തിറങ്ങുന്ന കുട്ടികള്‍ ഇവിടങ്ങളിലെത്തി അപകടം പിണയാന്‍ സാധ്യത ഏറെയാണ്. ഇത്തരം ഗുരുതര അനാസ്ഥ കാരണമാണ് തൊട്ടടുത്തുള്ള കുട്ടികളെ പോലും ഇവിടേക്കയക്കാന്‍ രക്ഷിതാക്കള്‍ മടിക്കുന്നത് .
തൃശൂര്‍ ജില്ലാപഞ്ചായത്തിന്റെ അധീനതയിലുള്ള വിദ്യാലയമാണിത്.
ശോച്യാവസ്ഥയിലായ കെട്ടിടങ്ങള്‍ പൊളിച്ചു കളയണമെന്ന അഭ്യര്‍ത്ഥന സ്‌കൂളില്‍ നിന്നും പലയാവര്‍ത്തി ജില്ലാപഞ്ചായത്തില്‍ എത്തിയിട്ടും അതിന്‍മേല്‍ നടപടികള്‍ ഉണ്ടായിട്ടില്ല.
ഇക്കഴിഞ്ഞ വേനലവധിക്കാലത്ത് ഈ കെട്ടിടങ്ങള്‍ പൊളിച്ചു മാറ്റിയിരുന്നെങ്കില്‍ അപകട ഭീഷണി ഒഴിയുമായിരുന്നു.
ശക്തമായ മഴക്കാലം എത്തിയിരിക്കേ കടുത്ത ആശങ്കയിലാണ് കുട്ടികളും രക്ഷിതാക്കളും അധ്യാപകരും.
ഓണാവധിക്കാലത്തെങ്കിലും ഇവ പൊളിച്ചു മാറ്റണമെന്നാണ് ഉയരുന്ന ആവശ്യം.