മഞ്ചേരി: ആവശ്യത്തിനു ജീവനക്കാരില്ലാത്തു മൂലം ജില്ലാ മൈനിംഗ് ആന്റ് ജിയോളജി ഓഫിസ് പ്രവര്‍ത്തനം അവതാളത്തില്‍. ജില്ലയില്‍ ജിയോളജി വകുപ്പിനു കീഴിലുള്ള ഏക ഓഫിസാണിത്. ദിനേന നൂറോളം പേരാണു വിവിധ ആവശ്യങ്ങള്‍ക്കായി ഓഫിസില്‍ എത്തുന്നത്. വീടുനിര്‍മാണവുമായി ബന്ധപ്പെട്ടു നിരവധി അപേക്ഷകള്‍ വില്ലേജ് ഓഫീസുകളില്‍ കെട്ടികിടക്കുന്നുണ്ട്.
കരിങ്കല്‍- ചെങ്കല്‍ ഖനനം, മണ്ണെടുക്കല്‍ ഉള്‍പ്പെടെയുള്ള പരാതികള്‍ പരിഹരിക്കാനും അനുമതി നല്‍കാനും മറ്റു വിവിധ പരിശോധനകള്‍ക്കും ഓഫിസിലുള്ളത് ജിയോളജിസ്റ്റ് , രണ്ട് അസിസ്റ്റന്റ് ഓഫിസര്‍, മൈനിംഗ് റവന്യു ഇന്‍സ്‌പെക്ടര്‍, രണ്ടു ക്ലര്‍ക്ക്, ഡ്രൈവര്‍ ഒരു പ്യൂണ്‍, വാച്ചര്‍ തുടങ്ങി പത്തു ജീവനക്കാര്‍ മാത്രം. മണ്ണെടുപ്പ്, ഖനന അനുമതി മറ്റു പരിശോധനകള്‍ തുടങ്ങി നിരവധി പ്രവര്‍ത്തനങ്ങളാണു ദിനേന നിര്‍വഹിക്കേണ്ടത്. എന്നാല്‍ താലൂക്ക് ഓഫിസിന്റെ പോലും സൗകര്യങ്ങള്‍ ജില്ലാ ജിയോളജി ഓഫിസിനില്ലെന്നാണ് അധികൃതര്‍ പറയുന്നത്.
1997ല്‍ നിലവില്‍വന്ന ഓഫിസില്‍ അന്നത്തെ സ്റ്റാഫ് പാറ്റേണാണ് ഇപ്പോഴുമുള്ളത്. സംസ്ഥാനത്ത് ക്വാറികളുടെ എണ്ണത്തില്‍ രണ്ടാംസ്ഥാനമുള്ള ജില്ലയില്‍ ഇതുസംബന്ധിച്ച നിരവധി പരാതികളാണു ഓഫിസിലുള്ളത്. ഇതും സമയത്തു പരിഹരിക്കപ്പെടുന്നില്ല. ജീവനക്കാരുടെ കുറവുമൂലം നിലവിലുള്ള ഉദ്യോഗസ്ഥര്‍ക്ക് ഇരട്ടി ജോലിഭാരം പേറേണ്ടിവരുന്നു. ഓഫിസിലെത്തുന്നവര്‍ക്കു ഇരിക്കാനോ പ്രാഥമിക കാര്യങ്ങള്‍ നിര്‍വഹിക്കാനോ സംവിധാനമില്ല.
ഓരോ വര്‍ഷവും നാലായിരത്തിലധികം പരാതികള്‍ ഓഫിസില്‍ എത്തുന്നുണ്ട്. നിരവധി ചോദ്യങ്ങള്‍ ഉന്നയിച്ചുള്ള നൂറുകണക്കിനു വിവരാവകാശങ്ങളാണ് ഓഫിസ് മേശപുറത്തുള്ളത്. ഇതെല്ലാം കൈകാര്യം ചെയ്യുന്നതിനു ജീവനക്കാരില്ലാത്തതതിനാല്‍ പരാതികള്‍ പരിഹാരമാവാതെ കുന്നുകൂടി കിടക്കുകയാണ്. ജിയോളജി ഓഫിസ് വഴി വര്‍ഷംതോറും കോടികള്‍ സര്‍ക്കാര്‍ ഖജനാവിലേക്കു വരുമാനമായി എത്തുന്നുണ്ട്. എന്നിട്ടും അടിസ്ഥാന സൗകര്യങ്ങള്‍ ഒരുക്കുന്നതില്‍ സര്‍ക്കാര്‍ നടപടി സ്വീകരിക്കുന്നില്ല.