കൊണ്ടോട്ടി: കൊണ്ടോട്ടിയില്‍ ആവേശത്തിന്റെ പെരുമ്പറ കൊട്ടി യു.ഡി.എഫ് സ്ഥാനാര്‍ത്ഥി പി.കെ.കുഞ്ഞാലിക്കുട്ടിയുടെ തെരഞ്ഞെടുപ്പ് പ്രചരണം. പെള്ളുന്ന വെയിലു വകവെക്കാതെ രാവിലെ 10ന് മുസ്‌ലിയാരങ്ങാടിയില്‍ നിന്ന് ആരംഭിച്ച പ്രചരണ പൊതു യോഗം രാത്രി പുളിക്കല്‍ പഞ്ചായത്തിലെ ആലക്ക പറമ്പിലാണ് സമാപിച്ചത്. മുസ്‌ലിം ലീഗ്-കോണ്‍ഗ്ര്‌സ് അകല്‍ച്ചയുള്ള സ്ഥലത്ത് പോലും യു.ഡി.എഫിന്റെ ഒരുമിച്ചുള്ള പ്രവര്‍ത്തനം പ്രചരണത്തിലെ വേറിട്ട കാഴ്ചയായി.
മുസ്‌ലിയാരങ്ങാടിയില്‍ ശശി തരൂര്‍ എം.പി ഉദ്ഘാടനം ചെയ്തു. പി.പി മൂസ അധ്യക്ഷനായി. എം.പിമാരായ കൊടിക്കുന്നില്‍ സുരേഷ്, ഇ.ടി മുഹമ്മദ് ബഷീര്‍, എം.എല്‍.എമാരായ ടി.വി ഇബ്രാഹീം, പി.കെ ബഷീര്‍ ,മുന്‍ എം.എല്‍.എ കെ.മുഹമ്മദുണ്ണിഹാജി, വി.എ കരീം, ഇഫ്തികാറുദ്ദീന്‍, ആര്യാടന്‍ ഷൗക്കത്ത് തുടങ്ങി നിരവധി പേര്‍ പങ്കെടുത്തു. കൊണ്ടോട്ടി നഗരസഭ, മുതുവല്ലൂര്‍, ചീക്കോട്, വാഴക്കാട്, വാഴയൂര്‍, പുളിക്കല്‍, ചെറുകാവ് പഞ്ചായത്തുകളിലുമായി 47 കേന്ദ്രങ്ങളില്‍ സ്വീകരണം നല്‍കി. രാവിലെ 10ന് തുടങ്ങി പ്രചരണം രാത്രി ഏറെ വൈകിയാണ് സമാപിച്ചത്. സമാപന സമ്മേളനം പുളിക്കല്‍ ആലക്കാ പറമ്പില്‍ കെ. മുരളീധരന്‍ എം.എല്‍.എ ഉദ്ഘാടനം ചെയ്തു.