ശ്രീനഗര്‍: ജമ്മുകശ്മിരില്‍ സൈനിക വാഹനത്തിനുനേരെ ഭീകരാക്രമണം. ഇന്നലെ ഉച്ചക്ക് 1.15ഓടെയായിരുന്നു ആക്രമണമെന്ന് സൈനിക വക്താവ് അറിയിച്ചു. ശ്രീനഗറിലെ പരിംപോറ-പത്താന്‍ചൗക്ക് ബൈപ്പാസ് റോഡില്‍ ജെ.വി.സി ആശുപത്രിക്ക് മുന്നില്‍ വച്ചാണ് സൈനിക വാഹനത്തിനുനേരെ ആക്രമണമുണ്ടായത്. സംഭവത്തില്‍ സൈനികന് പരുക്കേറ്റു.
ആക്രമണത്തിന്റെ പശ്ചാത്തതലത്തില്‍ സൈന്യം പ്രദേശത്ത് തെരച്ചില്‍ നടത്തിയെങ്കിലും ആരെയും കണ്ടെത്താനായില്ല. സൈന്യത്തിനൊപ്പം പൊലിസും ചേര്‍ന്നായിരുന്നു പരിശോധന. വെടിയൊച്ച കേട്ടതായി സമീപത്തുണ്ടായിരുന്ന ചിലര്‍ പൊലിസിന് മൊഴിനല്‍കി. അതേസമയം ഒരാള്‍ സംശയാസ്പദമായ സാഹചര്യത്തില്‍ തൊട്ടടുത്ത ഹോട്ടലിലേക്ക് കയറിയതായും ഇയാളാണ് സൈനിക വാഹനത്തിനുനേരെ ആക്രമണം നടത്തിയതെന്ന് സംശയിക്കുന്നുണ്ടെന്നും പൊലിസ് അറിയിച്ചു.