തിരുവനന്തപുരം: കുറ്റിയാണി ഗവ.എല്‍.പി.എസില്‍ വെമ്പായം പഞ്ചായത്തുതല പ്രവേശനോത്സവം നടന്നു. അക്ഷരത്തൊപ്പികള്‍ അണിയിച്ച് പാല്‍പായസം നല്‍കി വാദ്യഘോഷങ്ങളുടെ അകമ്പടിയോടെയാണ് നവാഗതരെ സ്‌കൂളേക്ക് എതിരേറ്റത്.
നെടുമങ്ങാട് പഞ്ചായത്ത് പ്രസിഡന്റ് ബി. ബിജു പ്രവേശനോത്സവം ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്റ് സീനത്തുബീവ് പഞ്ചായത്തിന്റെ കുടയും ബാഗും കുട്ടികള്‍ക്ക് വിതരണം ചെയ്തു. വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ തേക്കട അനില്‍കുമാര്‍ 'ആശാ രഞ്ജിത്ത്' സ്മാരക ലൈബ്രറി ഉദ്ഘാടനം ചെയ്തു. എസ്.എസ്.എല്‍.സി, പ്ലസ് ടു, എല്‍.എസ്.എസ് വിജയികള്‍ക്ക് ബ്ലോക്ക് മെംമ്പര്‍ സജുകുമാര്‍ ക്യാഷ് അവാര്‍ഡ് വിതരണം ചെയ്തു.
പി.ടി.എ പ്രസിഡന്റ് ബി. ബിനുകുമാര്‍ അധ്യക്ഷനായ ചടങ്ങില്‍ റിട്ട. എസ്.എസ്.എ പ്രോഗ്രാം ഓഫിസര്‍ ഡോ. വി. ഗിരീഷ്‌കുമാര്‍, ഹെഡ്മിസ്ട്രസ് വിമലാദേവി, എസ്.എം.സി ചെയര്‍മാന്‍ വിജയകുമാര്‍ പങ്കെടുത്തു. വിവിധ ക്ലബ്ബുകളും സംഘടനകളും കുട്ടികള്‍ക്ക് മധുരം നല്‍കി.