കോഴിക്കോട്: മെഡിക്കല്‍ കോളജ് ആശുപത്രിയില്‍ രോഗികള്‍ക്ക് എക്‌സ്‌റേ എടുക്കുന്ന സമയത്തില്‍ ഇന്നലെ മുതല്‍ മാറ്റം വരുത്തിയത് പ്രശ്‌നത്തിനിടയാക്കി.
ഒ.പിയില്‍ വരുന്നവര്‍ക്ക് വേണ്ടിയുള്ള എക്‌സ്‌റേ ഒരുമണിക്ക് ശേഷവും വാര്‍ഡുകളില്‍ നിന്നുള്ളവ രണ്ടുമണിക്ക് ശേഷവും എടുക്കാനാണത്രെ നിര്‍ദേശം.
ഒ.പിയില്‍ വന്നവര്‍ എക്‌സ്‌റേ എടുക്കാന്‍ വേണ്ടി കൗണ്ടറില്‍ ചെന്നപ്പോഴാണ് സമയമാറ്റത്തെപ്പറ്റി അറിയുന്നത്. ഒരുമണിക്ക് ശേഷം എക്‌സ്‌റേ എടുത്ത് റിസള്‍ട്ട് കിട്ടി വരുമ്പോഴേക്കും ഒ.പിയില്‍ പരിശോധിച്ചിരുന്ന ഡോക്ടര്‍മാര്‍ പോയിരിക്കും.
തുടര്‍ ചികിത്സാവശ്യത്തിന് എക്‌സ്‌റേ റിസള്‍ട്ട് ആവശ്യമാണ്. റിസള്‍ട്ട് ലഭിച്ച് ഒ.പിയിലെത്തിയപ്പോഴേക്കും ഡോക്ടറെ കാണാന്‍ കഴിയാതെ വന്ന രോഗികളും ബന്ധുക്കളുമാണ് ബഹളം വച്ചത്. ഇത്രയും കാലത്തിനിടക്കില്ലാത്ത പരിഷ്‌കാരത്തിനെതിരേ പ്രതിഷേധം ശക്തമാണ്.
അതിനിടെ സ്വകാര്യ എക്‌സ് റേ ലോബി ആശുപത്രിയിലെ എക്‌സ്‌റേ സമയമാറ്റത്തിനു പിന്നിലുണ്ടെന്ന ആരോപണമുണ്ട്.