നാഗ്പൂര്‍: വിമര്‍ശനങ്ങള്‍ക്കും കനത്ത എതിര്‍പ്പുകള്‍ക്കുമിടെ ആര്‍.എസ്.എസ് പരിപാടിയില്‍ സംബന്ധിക്കാന്‍ മുന്‍ രാഷ്ട്രപതിയും കോണ്‍ഗ്രസ് നേതാവുമായ പ്രണബ് മുഖര്‍ജി നാഗ്പൂരിലെത്തി. നാളെ സമ്മേളനത്തില്‍ പ്രണബ് പ്രസംഗിക്കും.

ആര്‍.എസ്.എസ് ആസ്ഥാനത്തു നടന്നുവരുന്ന സംഘ് ശിക്ഷാ വര്‍ഗ് എന്ന ക്യാംപിന്റെ സമാപന സമ്മേളനത്തിലാണ് മുഖ്യാതിഥിയായി പ്രണബിനെ ക്ഷണിച്ചിരിക്കുന്നത്.

പരിപാടിയില്‍ പങ്കെടുക്കുമെന്ന് പ്രണബ് നേരത്തെ അറിയിച്ചിരുന്നു. താന്‍ പരിപാടിയില്‍ പങ്കെടുക്കുന്നത് സംബന്ധിച്ച വിവാദങ്ങള്‍ക്കുള്ള മറുപടി നാഗ്പൂരില്‍ നല്‍കുമെന്നാണ് ഇതേപറ്റി പ്രണബ് പറഞ്ഞത്. ഇതോടെ നാളത്തെ സമ്മേളനത്തില്‍ പ്രണബ് എന്തു പറയുമെന്ന് ദേശീയ രാഷ്ട്രീയം ഉറ്റുനോക്കുകയാണ്.

പരിപാടിയില്‍ പങ്കെടുക്കരുതെന്ന് രമേശ് ചെന്നിത്തല, ജയ്‌റാം രമേഷ് ഉള്‍പ്പെടെ നിരവധി കോണ്‍ഗ്രസ് നേതാക്കള്‍ പ്രണബ് മുഖര്‍ജിയോട് ആവശ്യപ്പെട്ടിരുന്നു. എന്നാല്‍ ആര്‍എസ്എസ് ക്ഷണം സ്വീകരിച്ച് നാഗ്പൂരില്‍ എത്തുന്ന പ്രണബ് അവരുടെ പ്രത്യയശാസ്ത്രത്തിലെ തെറ്റെന്തെന്നു പറഞ്ഞു കൊടുക്കണമെന്നാണ് കോണ്‍ഗ്രസ് നേതാവ് പി. ചിദംബരം പറഞ്ഞത്.

ആര്‍എസ്എസിനെതിരേ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഉള്‍പ്പെടെയുള്ളവര്‍ രൂക്ഷമായ വിമര്‍ശനം നടത്തുമ്പോഴാണ് പ്രണബ് മുഖര്‍ജി ആര്‍എസ്എസ് ആസ്ഥാനത്തെത്തുന്നത്.