മലപ്പുറം: നിപാ ബാധിത ജില്ലകളില്‍ ഉള്‍പ്പെടെ ഒരുമിച്ച് നാളെതന്നെ വിദ്യാര്‍ഥികളുടെ കണക്കെടുപ്പ് നടത്തണമെന്ന പൊതുവിദ്യാഭ്യാസ ഡയറക്ടറുടെ ഉത്തരവ് മാറ്റി. കോഴിക്കോട്, മലപ്പുറം,വയനാട് ജില്ലകളിലും തലശ്ശേരി വിദ്യാഭ്യാസ ജില്ലയിലും സ്‌കൂള്‍ തുറന്നുള്ള ആറാംപ്രവൃത്തി ദിവസത്തിലും മറ്റുജില്ലകളില്‍ നേരത്തെയുള്ള ഉത്തരവ് പ്രകാരം നാളെയും വിദ്യാര്‍ഥികളുടെ തലയെണ്ണല്‍ നടത്താനാണ് തീരുമാനം. നിപാ ബാധയുടെ പശ്ചാത്തലത്തില്‍ മലപ്പുറത്തും കോഴിക്കോട്ടും സ്‌കൂളുകള്‍ തുറക്കുന്നത് നീട്ടിയിട്ടുണ്ടെങ്കിലും ഈ ജില്ലകളിലെയും കൂടി വിവരങ്ങള്‍ ഉള്‍പ്പെടത്തക്കരീതിയില്‍ എട്ടിന് തന്നെ വിദ്യാര്‍ഥികളുടെ കണക്കെടുക്കണമെന്ന പൊതുവിദ്യാഭ്യാസ വകുപ്പിന്റെ തീരുമാനം സംബന്ധിച്ച് കഴിഞ്ഞ ദിവസം സുപ്രഭാതം വാര്‍ത്ത നല്‍കിയിരുന്നു.
സംസ്ഥാനത്ത് തന്നെ ഏറ്റവും കൂടുതല്‍ വിദ്യാര്‍ഥികള്‍ പഠിക്കുന്ന മലപ്പുറം ജില്ലയേയും കോഴിക്കോടിനേയും തലശ്ശേരി വിദ്യാഭ്യാസജില്ലയേയും നിപായുടെ പശ്ചാത്തലത്തില്‍ കഴിഞ്ഞ ദിവസംവരെ അവധി നല്‍കിയ വയനാട് ജില്ലയെയും പരിഗണിക്കാതെയുള്ള കണക്കെടുപ്പ് അപൂര്‍ണമായിരിക്കും എന്നു ചൂണ്ടിക്കാട്ടിയായിരുന്നു വാര്‍ത്ത. ഇതിന്റെ പശ്ചാത്തലത്തില്‍ കണക്കെടുപ്പ് മാറ്റണമെന്നാവശ്യപ്പെട്ട് കെ.എസ്.ടി.യു ഉള്‍പ്പെടെയുള്ള അധ്യാപക സംഘടനകള്‍ പൊതുവിദ്യാഭ്യാസ ഡയറക്ടര്‍ക്ക് നിവേദനവും നല്‍കി.
ഇതിനെ തുടര്‍ന്നാണ് മലപ്പുറം, കോഴിക്കോട്, തലശ്ശേരി വിദ്യാഭ്യാസ ജില്ലകളിലെ കണക്കെടുപ്പ് 20ന് നടത്താന്‍ നിര്‍ദേശം നല്‍കിയത്. വയനാട് ജില്ലയില്‍ ഒരുദിവസം സ്‌കൂള്‍ പ്രവര്‍ത്തിച്ച ശേഷം അഞ്ചാം തിയതിവരെ അവധിയായിരുന്നു. ഇന്നലെയാണ് വീണ്ടും തുറന്നത്. ഇതുകാരണം ഇവിടെ സ്‌കൂള്‍ തുറന്ന് എന്നാണോ ആറാം പ്രവൃത്തി ദിനമായി വരുന്നത് അന്ന് കണക്കെടുപ്പ് നടത്തും. ഒന്നാം തിയതി സ്‌കൂള്‍ തുറന്ന ജില്ലകളില്‍ ജൂണ്‍ 8 നും ആയിരിക്കും കണക്കെടുപ്പ്.
സ്‌കൂള്‍ തുറന്ന് ക്ലാസുകള്‍ തുടങ്ങി ഏതാനും ദിവസം വിദ്യാലയങ്ങളില്‍ കുട്ടികള്‍ പുതുതായി ചേരുന്നത് പതിവാണ്. ഇതുപരിഗണിക്കാതെ മറ്റുജില്ലകളോടൊപ്പം കണക്കെടുപ്പ് നടത്തിയിരുന്നെങ്കില്‍ നിരവധി അധ്യാപകരുടെ തസ്തിക നഷ്ടമാവുമായിരുന്നു. മാത്രമല്ല സൗജന്യ യൂനിഫോം, പാഠ പുസ്തകങ്ങള്‍, ഉച്ചഭക്ഷണം, മറ്റാനുകൂല്യങ്ങള്‍ തുടങ്ങിയവക്കെല്ലാം ഈ കണക്കാണ് അടിസ്ഥാനമാക്കുന്നത്. സമ്പൂര്‍ണ സോഫ്റ്റ്‌വെയര്‍ മുഖാന്തരമാണ് വിദ്യാര്‍ഥികളുടെ വിവരശേഖരണം നടക്കുക. നിപാ ബാധിത ജില്ലകള്‍ ഒഴികെയുള്ളവര്‍ നാളെ ഉച്ചക്ക് ഒരുമണിക്കകം വിവരങ്ങള്‍ അപ്‌ലോഡ് ചെയ്യണം. എ.ഇ.ഒ, ഡി.ഇ.ഒ തലങ്ങളില്‍ പരിശോധിക്കുന്ന വിവരങ്ങള്‍ നാളെ മൂന്നുമണിയോടെ പൊതുവിദ്യാഭ്യാസ ഡയറക്ടറേറ്റില്‍ ലഭ്യമാകും.