ന്യൂഡല്‍ഹി: ഇന്ത്യയുടെ സ്റ്റാര്‍ ബാഡ്മിന്റണ്‍ താരവും ഒളിംപിക്ക് വെള്ളി മെഡല്‍ ജേത്രിയുമായ പി.വി സിന്ധു ഇന്ത്യ ഓപണ്‍ ബാഡ്മിന്റണിന്റെ ഫൈനലില്‍. സെമിയില്‍ ദക്ഷിണ കൊറിയന്‍ താരം സങ് ജി ഹ്യുനിനെ പരാജയപ്പെടുത്തിയാണു സിന്ധു കലാശപ്പോരിനെത്തുന്നത്. സ്‌കോര്‍: 21-18, 14-21, 21-14.
ഫൈനല്‍ പോരാട്ടം ഒളിംപിക്ക് വനിതാ സിംഗിള്‍സിന്റെ തനിയാവര്‍ത്തനമായി. ഒളിംപിക്ക് സ്വര്‍ണം സ്വന്തമാക്കിയ സ്‌പെയിനിന്റെ കരോലിന മരിനാണു ഫൈനലില്‍ സിന്ധുവിന്റെ എതിരാളി. സെമിയില്‍ ജപ്പാന്‍ താരം അകനെ യാമഗുചിയെ പരാജയപ്പെടുത്തിയാണു സ്പാനിഷ് താരം കാലാശക്കളിക്കെത്തുന്നത്. ഒളിംപിക്ക് ഫൈനലിലേറ്റ തോല്‍വി സ്വന്തം മണ്ണില്‍ പകരം ചോദിക്കാനുള്ള അവസരമാണു സിന്ധുവിനൊരുങ്ങിയിരിക്കുന്നത്.
ക്വാര്‍ട്ടറില്‍ ഇന്ത്യയുടെ തന്നെ സൈന നേഹ്‌വാളിനെ കീഴടക്കി സെമിയിലെത്തിയ സിന്ധു അവസാന നാലിലെ പോരാട്ടത്തിലും മികവ് ആവര്‍ത്തിക്കുകയായിരുന്നു. ലോക നാലാം നമ്പര്‍ താരമായ എതിരാളിക്കെതിരേ അഞ്ചാം റാങ്കിലുള്ള സിന്ധു കരുത്തുറ്റ പോരാട്ടം പുറത്തെടുത്താണു വിജയിച്ചത്.
ലോങ് റാലികള്‍ തൊടുക്കുന്നതില്‍ വിദഗ്ധയായ സങിനു പക്ഷേ ആ മികവ് സിന്ധുവിനെതിരേ വിജയിപ്പിക്കാന്‍ സാധിച്ചില്ല. സിന്ധുവിന്റെ സ്മാഷുകള്‍ക്കും ക്രോസ്, നെറ്റ് ഷോട്ടുകള്‍ക്കും മറുപടി പറയാനാകാതെ കൊറിയന്‍ താരം വിയര്‍ത്തു. തുടക്കത്തില്‍ ലീഡുമായി മുന്നേറിയ സിന്ധുവിനെ ഒരു ഘട്ടത്തില്‍ 7-7 എന്ന സ്‌കോറില്‍ പിടിക്കാന്‍ ഹ്യുനിനു സാധിച്ചെങ്കിലും തുടരെ അഞ്ചു പോയിന്റുകള്‍ നേടി ആദ്യ സെറ്റ് സിന്ധു പിടിച്ചെടുത്തു. എന്നാല്‍ ശക്തമായി തിരിച്ചടിച്ചു രണ്ടാം സെറ്റ് നേടി മടങ്ങിയെത്താന്‍ ഹ്യുനിനു സാധിച്ചു. രണ്ടാം സെറ്റിന്റെ തുടക്കത്തില്‍ തന്നെ കളിയുടെ നിയന്ത്രണം സ്വന്തമാക്കിയ ഹ്യുന്‍ ലീഡുമായി മുന്നോട്ടു പോയി. ബെയ്‌സ് ലൈന്‍ തന്ത്രം പ്രയോഗിച്ചായിരുന്നു കൊറിയന്‍ താരത്തിന്റെ മുന്നേറ്റം. എന്നാല്‍ തിരിച്ചു വരാനുള്ള ശ്രമം സിന്ധു നടത്തി. പക്ഷേ ഒരു ഘട്ടത്തില്‍ പോലും ലീഡ് മറികടക്കാന്‍ കൊറിയന്‍ താരം അനുവദിച്ചില്ല. സെറ്റ് 21-14 എന്ന സ്‌കോറിനു താരം സ്വന്തമാക്കിയതോടെ മൂന്നാം സെറ്റ് നിര്‍ണായകമായി. മൂന്നാം സെറ്റിന്റെ തുടക്കം മുതല്‍ സിന്ധു ലീഡില്‍ മുന്നേറുന്ന കാഴ്ച. മനഃപൂര്‍വമല്ലാത്ത പിഴവുകള്‍ കൊറിയന്‍ താരം വരുത്തിയതോടെ സിന്ധു 11-4 എന്ന മികച്ച ലീഡിലൂടെ കുതിച്ചു. എന്നാല്‍ തിരിച്ചു വരവിന്റെ സൂചനകള്‍ നല്‍കി ഹ്യുന്‍ ലീഡ് 12-10 എന്നാക്കി കുറച്ചു. എന്നാല്‍ കൃത്യസമയത്തു ടോപ് ഗിയറിലേക്കു മാറാറുള്ള സിന്ധു ആ മികവ് ഒരിക്കല്‍ കൂടി പുറത്തെടുത്തു ലീഡ് 18-12 എന്നാക്കി മാറ്റി. ബെയ്‌സ് ലൈന്‍ തന്ത്രവും നെറ്റ് അറ്റാക്കുകളുമായി സിന്ധു വേഗതയാര്‍ന്ന നീക്കങ്ങള്‍ നടത്തിയതോടെ ഹ്യുന്‍ നിസഹായയായി. ഒടുവില്‍ എതിരാളിക്കു പഴുതനുവദിക്കാതെ വിജയവും ഫൈനല്‍ ബര്‍ത്തും ഇന്ത്യന്‍ താരം ഉറപ്പിക്കുകയായിരുന്നു.

അക്‌സെല്‍സന്‍ - ചോവു ടീന്‍ ഫൈനല്‍

ന്യൂഡല്‍ഹി: ഇന്ത്യ ഓപണ്‍ ബാഡ്മിന്റണിന്റെ പുരുഷ സിംഗിള്‍സ് ഫൈനലില്‍ ഡെന്‍മാര്‍കിന്റെ വിക്ടര്‍ അക്‌സെല്‍സനും ചൈനീസ് തായ്‌പേയിയുടെ ചോവു ടീന്‍ ചെനും ഏറ്റുമുട്ടും. സെമിയില്‍ ഹോങ്കോങ് താരം ക ലോങ് അന്‍ഗുസിനെ പരാജയപ്പെടുത്തിയാണു അക്‌സെല്‍സന്‍ ഫൈനലിലെത്തിയത്. സ്‌കോര്‍: 21-12, 21-13. ഡെന്‍മാര്‍കിന്റെ ആന്‍ഡേഴ്‌സ് അന്റന്‍സനെ പരാജയപ്പെടുത്തിയാണു ചെന്‍ ഫൈനല്‍ ബര്‍ത്തുറപ്പിച്ചത്. സ്‌കോര്‍: 21-17, 21-14.