സ്വന്തം ലേഖകന്‍
തിരുവനന്തപുരം: കൊവിഡ് പശ്ചാത്തലത്തില്‍ സംസ്ഥാനത്തെ അഗതികള്‍ക്കും അശരണര്‍ക്കും കൈത്താങ്ങായി സര്‍ക്കാര്‍. സംസ്ഥാനത്തെ അംഗീകൃതവും അല്ലാത്തതുമായ അഗതിമന്ദിരങ്ങള്‍ക്ക് ഭക്ഷ്യകിറ്റും ധാന്യവും അനുവദിച്ച് സര്‍ക്കാര്‍ ഉത്തരവിറങ്ങി. ആളൊന്നിന് 15 കിലോവരെ ഭക്ഷ്യധാന്യവും നാലുപേര്‍ക്ക് ഒരു ഭക്ഷ്യകിറ്റും സൗജന്യമായി അനുവദിച്ചാണ് ഉത്തരവ്. കൊവിഡ് മൂലം പ്രതിസന്ധിയിലായ സംസ്ഥാനത്തെ അഗതിമന്ദിരങ്ങള്‍ക്ക് ആശ്വാസം ലഭിക്കുന്നതാണ് നടപടി.
സംസ്ഥാനത്ത് വെല്‍ഫെയര്‍ പെര്‍മിറ്റ് മുഖാന്തിരം ഭക്ഷ്യധാന്യങ്ങള്‍ ലഭിക്കുന്ന സ്ഥാപനങ്ങളിലെ അന്തേവാസികളില്‍ ആളൊന്നിന് 10.5 കിലോ അരിയും 4.5 കിലോ ഗോതമ്പുമാണ് സൗജന്യമായി നല്‍കുക.
അംഗീകൃതമല്ലാത്തതും സര്‍ക്കാര്‍ സഹായം ലഭിക്കാത്തതുമായ അഗതിമന്ദിരങ്ങള്‍, ക്ഷേമ സ്ഥാപനങ്ങള്‍, ക്ഷേമ ആശുപത്രികള്‍, കന്യാസ്ത്രീ മഠങ്ങള്‍, ആശ്രമങ്ങള്‍ തുടങ്ങിയ എല്ലാത്തരം സ്ഥാപനങ്ങളിലുമുള്ള ഒരാള്‍ക്ക് അഞ്ചുകിലോഗ്രാം അരി വീതം സൗജന്യമായി വിതരണം ചെയ്യും.
ഇത്തരം എല്ലാ സ്ഥാപനങ്ങളിലെയും അന്തേവാസികള്‍ക്ക് നാലുപേര്‍ക്ക് ഒന്ന് വീതം അവശ്യസാധനങ്ങള്‍ ഉള്‍പ്പെടുന്ന ഭക്ഷ്യകിറ്റും സൗജന്യമായി വിതരണം ചെയ്യും. വിതരണത്തിന് ജില്ലാ സപ്ലൈ ഓഫിസര്‍മാരും ജില്ലാ സാമൂഹിക നീതി ഓഫിസര്‍മാരും സംയുക്തമായി ക്രമീകരണങ്ങളൊരുക്കും. ഇവ എത്രയും വേഗം അഗതിമന്ദിരങ്ങളില്‍ എത്തിക്കുമെന്ന് സിവില്‍ സപ്ലൈസ് വകുപ്പ് അറിയിച്ചു.
കുട്ടികള്‍ക്കും മുതിര്‍ന്നവര്‍ക്കുമായി പ്രവര്‍ത്തിക്കുന്ന മുവ്വായിരത്തോളം സര്‍ക്കാര്‍ അംഗീകൃത അഗതിമന്ദിരങ്ങളാണ് സംസ്ഥാനത്തുള്ളത്. അംഗീകൃതവും അല്ലാത്തതുമായ അഗതിമന്ദിരങ്ങള്‍, ക്ഷേമസ്ഥാപനങ്ങള്‍, ആശ്രമങ്ങള്‍ കോണ്‍വെന്റുകള്‍ എന്നിവിടങ്ങളിലായി ഒരു ലക്ഷത്തോളം അന്തേവാസികളുണ്ട്. കൊവിഡ് പശ്ചാത്തലത്തില്‍ നിലവില്‍ സ്‌പോണ്‍സര്‍ഷിപ്പ് ലഭിക്കുന്നതില്‍ പ്രശ്‌നങ്ങളുള്ളതിലാണ് ഭക്ഷ്യധാന്യങ്ങള്‍ ഉറപ്പുവരുത്താനുള്ള സര്‍ക്കാര്‍ നടപടി.