തിരുവനന്തപുരം: പൊലിസ് നിയമലംഘകരാകുന്ന സംഭവങ്ങള്‍ ആവര്‍ത്തിക്കുന്നത് ആശങ്കാജനകമാണെന്ന് ഭരണപരിഷ്‌കരണ കമ്മിഷന്‍ അധ്യക്ഷന്‍ വി.എസ് അച്യുതാനന്ദന്‍. ആലുവ എടത്തലയില്‍ യുവാവിനെ പൊലിസുകാര്‍ ക്രൂരമായി മര്‍ദിച്ച സംഭവത്തിന്റെ പശ്ചാത്തലത്തിലായിരുന്നു വി.എസിന്റെ പ്രതികരണം. മാധ്യമങ്ങള്‍ പുറത്തുകൊണ്ടുവരുമ്പോഴും ജനങ്ങള്‍ പ്രതിഷേധിക്കുമ്പോഴുമാണ് പലപ്പോഴും ഇത്തരം നിയമലംഘനങ്ങള്‍ പൊലിസ് മേധാവികളുടെ ശ്രദ്ധയില്‍ വരുന്നത്.
ജനങ്ങളുടെ ജീവനും സ്വത്തിനും സംരക്ഷണം നല്‍കാന്‍ നിയോഗിക്കപ്പെട്ടവര്‍ തന്നെ ഭീഷണിയാകുന്നത് ഒട്ടും ആശാസ്യമല്ല. ഇത്തരം ഉദ്യോഗസ്ഥര്‍ക്ക് പൊലിസ് സേനയില്‍ സ്ഥാനമുണ്ടാകില്ലെന്ന സന്ദേശമാണ് അടിയന്തരമായി നല്‍കേണ്ടത്. അതിനു കര്‍ശനമായ മാതൃകാ നടപടികളുണ്ടാകണം.ആവശ്യമെങ്കില്‍ നിയമ നിര്‍മാണം നടത്തുന്ന കാര്യവും ആലോചിക്കണമെന്നും വി.എസ് പ്രസ്താവനയില്‍ പറഞ്ഞു.