സ്വന്തം ലേഖകര്‍

പാലക്കാട് /തൃശൂര്‍: ലോക്ക് ഡൗണ്‍ പ്രഖ്യാപിച്ചതിനെത്തുടര്‍ന്ന് അസമിലെ ദിബ്രുഗഢില്‍ നിന്ന് കന്യാകുമാരിയിലേക്ക് വരികയായിരുന്ന വിവേക് എക്‌സ്പ്രസില്‍ എത്തി കേരളത്തില്‍ നിരീക്ഷണത്തിലാക്കിയ 290 യാത്രക്കാരെ നിരീക്ഷണ കാലാവധി കഴിഞ്ഞതിനെ തുടര്‍ന്ന് റവന്യൂ വകുപ്പ് ഇന്നലെ അവരവരുടെ വീടുകളിലെത്തിച്ചു.    

പാലക്കാട്ടിറക്കി നിരീക്ഷണത്തിനായി ജില്ലയുടെ വിവിധ ഭാഗങ്ങളില്‍ പാര്‍പ്പിച്ചിച്ചിരുന്ന 140 പേരെയും തൃശൂരില്‍ ഇറക്കി കിലയിലെ പരിശോധനാ കേന്ദ്രത്തില്‍ ഒരുക്കിയ കെയര്‍ സെന്ററിലേക്കു മാറ്റിയ 150 പേരെയുമാണ് നാട്ടിലേക്കയച്ചത്. ഇവരെല്ലാം മലയാളികളാണ്. കെ.എസ്.ആര്‍.ടി.സി ബസുകളിലും ടെമ്പോകളിലും കാറുകളിലുമായാണ് ഇവരെ കൊണ്ടുവിട്ടത്. 

പാലക്കാട്ട് നിരീക്ഷണത്തില്‍ കഴിഞ്ഞിരുന്ന അസമില്‍ നിന്നുള്ള ഒരു സ്ത്രീയും അവരുടെ രണ്ടു വയസുള്ള കുഞ്ഞും മുംബൈയില്‍ സ്ഥിരതാമസമാക്കിയ ഒരു മലയാളി സ്ത്രീയും തല്‍ക്കാലം പാലക്കാട്ടു തന്നെ കഴിയേണ്ടി വരും. കിലയിലും മറ്റു സംസ്ഥാനങ്ങളില്‍ നിന്നുള്ള 50 പേര്‍ അവശേഷിക്കുന്നുണ്ട്.

പാലക്കാട്ടുള്ളവര്‍ക്ക് ഇനിയുള്ള ദിവസങ്ങളില്‍ മലമ്പുഴയിലെ കെ.ടി.ഡി.സി ഹോട്ടലില്‍ റവന്യൂ വകുപ്പ് താമസ സൗകര്യവും ഭക്ഷണ സൗകര്യവും ഒരുക്കിയിട്ടുണ്ട്. നിരീക്ഷണ കാലാവധിയായ 14 ദിവസം പിന്നിട്ടതോടെ ഡോക്ടര്‍മാര്‍ ഇവരെ പരിശോധിച്ച് രോഗബാധ ഇല്ലെന്നു സ്ഥിരീകരിച്ചതിനു ശേഷമാണ് വീടുകളിലേക്കയച്ചത്. രണ്ടിടങ്ങളിലുമായി അവശേഷിക്കുന്ന ഇതര സംസ്ഥാനക്കാര്‍ക്കും രോഗലക്ഷണമൊന്നുമില്ല. 

വിവിധ ജില്ലകളിലെ ഡി.എം.ഒമാരുടെ ചുമതലയിലാണ് യാത്രക്കാരെ വീടുകളിലേക്കയച്ചത്.