സ്വന്തം ലേഖകന്‍

നിലമ്പൂര്‍: കൊവിഡ് കാലത്ത് സംസ്ഥാനത്തെ ഗ്രാമപഞ്ചായത്തുകള്‍ പ്രതിരോധ പ്രവര്‍ത്തനങ്ങളില്‍ സജീവമാണ്. തദ്ദേശ സ്വയംഭരണ വകുപ്പ് അധികൃതര്‍ പുറത്തുവിട്ട വിവരങ്ങള്‍ പ്രകാരം സര്‍ക്കാര്‍ നിര്‍ദേശമനുസരിച്ച് വാര്‍ഡ് പ്രതിനിധികള്‍ മുതല്‍ ഉന്നത ഉദ്യോഗസ്ഥര്‍ വരെ പ്രതിരോധത്തിന്റെ മുറിയാത്ത ചങ്ങലകണ്ണികളാണിപ്പോള്‍. സംസ്ഥാനത്തെ ഗ്രാമപഞ്ചായത്തുകളുടെ കൊവിഡ് പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്നതിനും സ്ഥിതിവിവരങ്ങള്‍ ക്രോഡീകരിച്ച് സര്‍ക്കാരിന് ലഭ്യമാക്കുന്നതിനും പഞ്ചായത്ത് ഡയറക്ടറേറ്റിലും ജില്ലാ ഓഫിസുകളിലും വാര്‍റൂമുകളും സജ്ജീകരിച്ചിട്ടുണ്ട്.

 

 

941 ഗ്രാമപഞ്ചായത്തുകളില്‍ പ്രവര്‍ത്തിക്കുന്നത് 1037 സമൂഹ അടുക്കളകള്‍. ഇവയിലൂടെ ആകെ 19,24,827 പേര്‍ക്കാണ് ഇതുവരെ ഭക്ഷണം നല്‍കിയത്. ഇതിലാവട്ടെ 17,38,192 പേര്‍ക്കും സൗജന്യമായാണ് നല്‍കിയത്. ഗ്രാമപ്രദേശങ്ങളില്‍ ജനങ്ങള്‍ക്ക് ന്യായവിലയ്ക്ക് ഭക്ഷണം നല്‍കുന്നതിന് 134 ജനകീയ ഹോട്ടലുകളും പ്രവര്‍ത്തനം ആരംഭിച്ചിട്ടുണ്ട്. അതാത് പഞ്ചായത്തുകളിലെ സന്നദ്ധപ്രവര്‍ത്തകരാണ് ആവശ്യക്കാര്‍ക്ക് ഭക്ഷണം വീടുകളില്‍ എത്തിച്ചുകൊടുക്കുന്നത്. 

 

 

 

ലോക്ക്ഡൗണിന്റെ പശ്ചാത്തലത്തില്‍ ഭക്ഷണം, മരുന്ന് ഉള്‍പ്പെടെയുള്ള അവശ്യസാധനങ്ങള്‍ എത്തിക്കുന്നതിലും സംസ്ഥാനത്ത് 15962 വാര്‍ഡ്തല ഹെല്‍ത്ത് കമ്മിറ്റികളും 15962 ആരോഗ്യ ജാഗ്രത സമിതികളും 48817 ദുരന്തനിവാരണ എമര്‍ജന്‍സി റെസ്‌പോണ്‍സ് ടീമുകളും യുദ്ധകാലാടിസ്ഥാനത്തില്‍ പ്രവര്‍ത്തിച്ചുവരുന്നുണ്ട്. 

ഇതിനു പുറമെ വീടുകളില്‍ ഐസൊലേഷനില്‍ കഴിയുന്നവരെ നിരീക്ഷിക്കുന്നതിന് 15825 വാര്‍ഡ് തല നിരീക്ഷണ കമ്മിറ്റികളുമുണ്ട്. 

പ്രാഥമിക ആരോഗ്യകേന്ദ്രങ്ങളില്‍ നിലവിലുള്ള മെഡിക്കല്‍ ഓഫിസര്‍ക്ക് പുറമേ 183 പേരെ അധികമായി പഞ്ചായത്തുകള്‍ നിയോഗിച്ചിട്ടുണ്ട്. 

 

 

അവശ്യഘട്ടങ്ങളില്‍ പ്രയോജനപെടുത്തുന്നതിനു പഞ്ചായത്ത് പരിധിയിലുള്ള 3396 ഡോക്ടര്‍മാര്‍, 5851 നേഴ്‌സ്മാര്‍, 4086 പാരാ മെഡിക്കല്‍ ജീവനക്കാര്‍, 1280 ലാബ് ടെക്‌നീഷ്യന്മാര്‍, 3410 മെഡിക്കല്‍ വിദ്യാര്‍ഥികള്‍, 7730 പാലിയേറ്റിവ് കെയര്‍ പ്രവര്‍ത്തകര്‍ എന്നിവരുടെ റിസര്‍വ് പട്ടികയും തയാറാക്കിയിട്ടുണ്ട്. 

67 പഞ്ചായത്തുകളില്‍ താല്‍ക്കാലിക ചികിത്സാ കേന്ദ്രങ്ങള്‍ തയാര്‍

 

സംസ്ഥാനത്തെ ഗ്രാമപ്രദേശങ്ങളില്‍ കൊവിഡ് 19 ഹോട്ട്‌സ്‌പോട്ട് ആകാന്‍ സാധ്യതയുള്ള 67 പഞ്ചായത്തുകളില്‍ ഫസ്റ്റ് ലൈന്‍ ചികിത്സാ കേന്ദ്രങ്ങള്‍ സ്ഥാപിക്കാനുള്ള കെട്ടിടങ്ങളും കണ്ടെത്തിയിട്ടുണ്ട്.നിലവിലുള്ള ലേബര്‍ ക്യാംപുകള്‍ കൂടാതെ അതിഥി തൊഴിലാളികളെ പാര്‍പ്പിക്കുന്നതിന് 20 താല്‍ക്കാലിക ലേബര്‍ക്യാംപുകളും ആരംഭിച്ചിട്ടുണ്ട്. മുന്‍കരുതലിന്റെ ഭാഗമായി സംസ്ഥാനത്തെ ഗ്രാമപഞ്ചായത്ത് പ്രദേശങ്ങളില്‍ നിലവിലുള്ള കൊവിഡ് കെയര്‍ സെന്ററുകള്‍ക്കും ഐസൊലേഷന്‍ സെന്ററുകള്‍ക്കും പുറമേ കൊവിഡ് കെയര്‍ സെന്ററുകളായി പ്രവര്‍ത്തിപ്പിക്കാന്‍ അനുയോജ്യമായ 2378 കെട്ടിടങ്ങള്‍ സജ്ജമാക്കിയിട്ടുണ്ട്. ഭക്ഷ്യധാന്യങ്ങള്‍ സൂക്ഷിക്കുന്നതിന് അനുയോജ്യമായ 1383 കെട്ടിടങ്ങളും കണ്ടെത്തിയിട്ടുണ്ട്.