തിരുവനന്തപുരം: പ്രതിപക്ഷ ബഹളത്തിനിടെ മൂന്നു ബില്ലുകള്‍ നിയമസഭ ചര്‍ച്ചയില്ലാതെ സബ്ജക്ട് കമ്മിറ്റിക്ക് വിട്ടു. കേരള സംസ്ഥാന ഉന്നത വിദ്യാഭ്യാസ കൗണ്‍സില്‍ (ഭേദഗതി) ബില്‍, പഞ്ചായത്ത് രാജ് (രണ്ടാം ഭേദഗതി) ബില്‍, തിരുവിതാംകൂര്‍-കൊച്ചി ഹിന്ദുമത സ്ഥാപനങ്ങള്‍ (ഭേദഗതി) ബില്‍ എന്നിവയാണ് സബ്ജക്ട് കമ്മിറ്റിക്കു വിട്ടത്.
ഡോ. രാജന്‍ ഗുരുക്കള്‍ കമ്മിഷന്‍ ശുപാര്‍ശകളുടെ അടിസ്ഥാനത്തിലാണു കേരള സംസ്ഥാന ഉന്നത വിദ്യാഭ്യാസ കൗണ്‍സില്‍ ആക്ട് (2007) ഭേദഗതി ചെയ്യുന്നത്. ഇതിനായി നേരത്തെ പുറപ്പെടുവിച്ച ഓര്‍ഡിനന്‍സിനു പകരമായുള്ള ബില്ലാണിത്. ഭേദഗതിയനുസരിച്ച് ഉന്നത വിദ്യാഭ്യാസ കൗണ്‍സിലിനു കീഴില്‍ ഉപദേശക കൗണ്‍സിലുകള്‍ക്കു പകരം ഉപദേശക ബോഡികള്‍ വരും. കേന്ദ്ര സര്‍ക്കാരിന്റെ മാനവവിഭവ വികസന മന്ത്രാലയത്തിനു കീഴിലുള്ള രാഷ്ട്രീയ ഉച്ചതര്‍ ശിക്ഷാ അഭിയാന്റെ (റൂസ) മാര്‍ഗനിര്‍ദേശങ്ങള്‍ കൂടി കണക്കിലെടുത്താണു ഭേദഗതി.
പഞ്ചായത്തംഗങ്ങള്‍ സ്വത്തുവിവരം സംബന്ധിച്ച പ്രസ്താവന ബന്ധപ്പെട്ട അധികാരിക്കു നല്‍കുന്നതിനുള്ള കാലാവധി ചുമതലയേറ്റ ദിവസം മുതല്‍ 30 മാസം വരെയാക്കി ദീര്‍ഘിപ്പിക്കുന്നതിനുള്ളതാണ് പഞ്ചായത്ത് രാജ് (രണ്ടാം ഭേദഗതി) ബില്‍. നിലവില്‍ ഇതു 15 മാസമാണ്. പല കാരണങ്ങളാലും നിലവിലെ സമയപരിധിക്കുള്ളില്‍ സ്വത്തുവിവരം സമര്‍പ്പിക്കാന്‍ പഞ്ചായത്തംഗങ്ങള്‍ക്കു സാധിക്കാതെ വരുന്ന സാഹചര്യം കണക്കിലെടുത്താണ് ഭേദഗതി കൊണ്ടുവരുന്നത്.
1950ലെ തിരുവിതാംകൂര്‍-കൊച്ചി ഹിന്ദുമത സ്ഥാപനങ്ങള്‍ ആക്ട് വീണ്ടും ഭേദഗതി ചെയ്യുന്നതിനുള്ളതാണ് 2018ലെ തിരുവിതാംകൂര്‍-കൊച്ചി ഹിന്ദുമത സ്ഥാപനങ്ങള്‍ (ഭേദഗതി) ബില്‍. ദേവസ്വം ബോര്‍ഡ് അംഗങ്ങളുടെ കാലാവധി മൂന്നു വര്‍ഷത്തില്‍നിന്ന് രണ്ടു വര്‍ഷമായി കുറയ്ക്കുന്നതാണ് ബില്ലിലെ പ്രധാന വ്യവസ്ഥ.