തുറവൂര്‍: പട്ടണക്കാട് പുതിയകാവില്‍ യുവാവ് ഭാര്യയെ കോടാലിക്കൈകൊണ്ട് തലയ്ക്കടിച്ചു കൊന്നു. പട്ടണക്കാട് ഗ്രാമപഞ്ചായത്ത് ഏഴാം വാര്‍ഡില്‍ പുതിയകാവ് പടിഞ്ഞാറേചാണിയില്‍ പ്രജിത്തിന്റെ ഭാര്യ സൗമ്യ(38)യാണ് കൊല്ലപ്പെട്ടത്.

ഇന്നലെ പുലര്‍ച്ചെ അഞ്ചിനായിരുന്നു സംഭവം. പ്രജിത്ത് (40) ഭാര്യയെ തലയ്ക്കടിച്ച ശേഷം തൊട്ടടുത്ത് താമസിക്കുന്ന ജേഷ്ഠസഹോദരന്‍ പ്രതാപന്റെ വസതിയില്‍ ചെന്ന് വിവരം ധരിപ്പിക്കുകയും രണ്ടു വയസ്സുള്ള മകള്‍ അവന്തികയെ അവിടെ ഏല്‍പിക്കുകയും ചെയ്തു. തുടര്‍ന്ന് പട്ടണക്കാട് പൊലിസ് സ്റ്റേഷനിലെത്തി പ്രജിത്ത് കീഴങ്ങി. ഉടന്‍ പൊലിസെത്തി സൗമ്യയെ ചേര്‍ത്തല ഗവ. താലൂക്കാശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 

കുടുംബവഴക്കാണ് സംഭവത്തിനു പിന്നിലെന്ന് പൊലിസ് പറഞ്ഞു. പട്ടണക്കാട് നാട്ടുവെളിച്ചം ഡ്രൈവിങ് സ്‌കൂളിലെ പരിശീലകനാണ് പ്രജിത്ത്. തുറവൂര്‍ തെക്ക് ആലക്കാപ്പറമ്പ് തട്ടുപുരയില്‍ രാമകൃഷ്ണന്റെ മൂത്ത മകളാണ് സൗമ്യ. മൂന്നു വര്‍ഷം മുമ്പായിരുന്നു ഇവരുടെ വിവാഹം.