ന്യൂഡല്‍ഹി: മയൂര്‍ വിഹാറില്‍ മലയാളി വിദ്യാര്‍ഥിയായ രജതിനെ കൊലപ്പെടുത്തിയ കേസില്‍ പ്രായപൂര്‍ത്തിയാവാത്ത പ്രതിയെ മുതിര്‍ന്ന കുറ്റവാളിയായി കണക്കാക്കാന്‍ പൊലിസിന്റെ നീക്കം. അംഗീകാരത്തിനായി പൊലിസ് ജുവനൈല്‍ ജസ്റ്റിസ് ബോര്‍ഡിനെ സമീപിക്കാനൊരുങ്ങുന്നു. കുറ്റകൃത്യത്തിന്റെ ഗൗരവം തിരിച്ചറിയാനുള്ള പക്വത പ്രതിക്കുണ്ടെന്നാണ് പൊലിസ് പറയുന്നത്.

സംഭവത്തില്‍ ദൃക്‌സാക്ഷികളായ വിദ്യാര്‍ഥികള്‍ ഉള്‍പ്പെടെയുള്ളവരുടെ രഹസ്യമൊഴിയെടുക്കാനും പൊലിസ് തീരുമാനിച്ചിരുന്നു. പാന്‍ കച്ചവടക്കാരന്റെ മൂത്തമകന്‍ അലോകിന്റെ പ്രായപൂര്‍ത്തി തെളിയിക്കുന്ന രേഖകള്‍ ഹാജരാക്കാന്‍ പൊലിസ് സ്്കൂള്‍ പ്രിന്‍സിപ്പലിനോട് ആവശ്യപ്പെട്ടിട്ടുണ്ട്.

കഴിഞ്ഞ ബുധനാഴ്ച്ച രാത്രിയിലാണ് സുഹൃത്തുകളുമായി വീട്ടിലേക്ക് പോവുകയായിരുന്ന രജതിനെ പാന്‍മസാല വില്‍പ്പനക്കാരനും കൂട്ടാളികളും ചേര്‍ന്ന് മര്‍ദ്ദിച്ച് കൊലപ്പെടുത്തിയത്.