ശ്രീനഗര്‍: ജമ്മുകശ്മീരിലെ പാംപോറില്‍ ഉണ്ടായ ഭീകരാക്രമണത്തിന് നേതൃത്വം നല്‍കിയ ഭീകരരെ സഹായിച്ച ഡ്രൈവറെ തിരിച്ചറിഞ്ഞു. ആക്രമണം നടന്ന അന്നു മുതല്‍ ഇയാള്‍ ഒളിവിലാണ്. ഇയാള്‍ക്ക് തീവ്രവാദികളുമായി ബന്ധമുണ്ടെന്ന് തിരിച്ചറിഞ്ഞെങ്കിലും കൃത്യമായ തെളിവില്ലാത്തതിനെ തുടര്‍ന്നാണ് പിടികൂടാത്തതെന്ന് പൊലിസ് പറഞ്ഞു.
ശ്രീനഗറില്‍ നിന്നും 57 കിലോമീറ്റര്‍ അകലെയുള്ള ബാബാ രേഷില്‍ നിന്നും നാല് ലഷ്‌കറെ ത്വയ്യിബ തീവ്രവാദികളെ വണ്ടിയില്‍ പുല്‍വാമ ജില്ലയിലെത്തിച്ചയാളാണ് പിടിയിലായതെന്ന് സൈനിക വൃത്തങ്ങള്‍ അറിയിച്ചു. ശനിയാഴ്ചയാണ് പാംപോറില്‍ സി.ആര്‍.പി.എഫിന്റെ വാഹനവ്യൂഹത്തിന് നേരെ ഭീകരാക്രമണമുണ്ടായത്. സംഭവത്തില്‍ ഒരു മുതിര്‍ന്ന ഉദ്യോഗസ്ഥനുള്‍പ്പെടെ എട്ട് ജവാന്മാര്‍ കൊല്ലപ്പെട്ടിരുന്നു. സൈന്യം രണ്ട് ഭീകരരെയും ഏറ്റുമുട്ടലില്‍ വധിച്ചിരുന്നു.