റിയാദ്: സഊദിയിൽ കഴിഞ്ഞ 24 മണിക്കൂറിനിടെ മൂന്ന് പേർ വൈറസ് ബാധിച്ച് മരണപ്പെട്ടതായി സഊദി ആരോഗ്യ മന്ത്രാലയം അറിയിച്ചു. ഇതോടെ രാജ്യത്തെ വൈറസ് ബാധയേറ്റു മരണപെട്ടവരുടെ എണ്ണം 44 ആയി ഉയർന്നു. പുതുതായി 355 വൈറസ് ബാധ കൂടി സ്ഥിരീകരിച്ചിട്ടുണ്ട്. ഇതോടെ രാജ്യത്തെ വൈറസ് ബാധിതരുടെ എണ്ണം 3287 ആയി ഉയർന്നു. നിലവിൽ 2577 ആളുകളാണ് ചികിത്സയിൽ കഴിയുന്നത്. 35 പേര്‍ക്കാണ് ഇന്ന് രോഗമുക്തി സ്ഥിരീകരിച്ചത്. ഇതോടെ രോഗ മുക്തി നേടിയവരുടെ എണ്ണം 666 ആയി ഉയർന്നു.

#الصحة تعلن عن تسجيل (355) حالة إصابة جديدة بفيروس #كورونا الجديد (كوفيد19)، وتسجيل (3) حالات وفيات رحمهم الله، وتسجيل (35) حالة تعافي ليصبح مجموع الحالات المتعافية (666) حالة ولله الحمد. pic.twitter.com/uU60I2vNTG

— و ز ا ر ة ا لـ صـ حـ ة السعودية (@SaudiMOH) April 9, 2020

    മദീനയിലാണ് ഇന്ന് ഏറ്റവും കൂടുതൽ വൈറസ് ബാധ കണ്ടെത്തിയത്. 89 വൈറസ് ബാധിതരെയാണ് ഇവിടെ സ്ഥിരീകരിച്ചത്. ഇതോടെ മദീനയിൽ വൈറസ് ബാധിതരുടെ എണ്ണം 420 ആയി ഉയർന്നു. റിയാദിൽ 83 വൈറസ് ബാധ കേസുകൾ കണ്ടെത്തിയതോടെ നിലവിൽ ഇവിടെ കണ്ടെത്തിയ വൈറസ് ബാധിതരുടെ എണ്ണം 961 ആയി ഉയർന്നു. മക്കയിൽ ഇന്ന് 78 കേസുകള്‍ കൂടി സ്ഥിരീകരിച്ചതോടെ ആകെ രോഗസംഖ്യ 631 ആയി. ജിദ്ദയില്‍ 54 പുതിയ കേസുകളടക്കം രോഗസംഖ്യ 477 ആയി. തബൂക്കില്‍ 26 പുതിയ കേസുകളും ഖതീഫില്‍ പത്ത് പുതിയ കേസുകളും റിപ്പോര്‍ട്ട് ചെയ്തു. കൂടാതെ, യാമ്പു, തായിഫ്, ദിരിയ (04 കേസുകൾ വീതം), ഹുഫൂഫ്, ഉനൈസ, ഖർജ് (02 കേസുകൾ വീതം), ഖമീസ് മുശൈത്, അഹദ് റുഫൈദ, ബീഷ, അൽബാഹ, റിയാദ് അൽഖബറ, നജ്‌റാൻ എന്നിവിടങ്ങളിൽ ഓരോരുത്തർക്കുമാണ് ഇന്ന് വൈറസ് സ്ഥിരീകരിച്ചത്.

     റിയാദിലും മദീനയിലും മലയാളികളടക്കം നിരവധി ഇന്ത്യക്കാര്‍ ചികിത്സയിലുണ്ട്. പുറത്തിറങ്ങിയാല്‍ അവസ്ഥ ഗുരുതരമാകുമെന്ന് ആരോഗ്യ മന്ത്രാലയം ഇന്നും മുന്നറിയിപ്പ് നല്‍കി. കടുത്ത നിയന്ത്രണങ്ങൽ ഏർപ്പെടുത്തിയ ഭരണകൂടം ഇത് കൂടുതൽ കർശനമാക്കാനുള്ള ഒരുക്കത്തിലാണ്.