കോപ്പന്‍ഹേഗന്‍: മാസങ്ങള്‍ക്കു ശേഷം നൊബേല്‍ സമ്മാനം സ്വീകരിക്കാന്‍ ബോബ് ഡിലന്‍ എത്തി. മഹത്തായ അമേരിക്കന്‍ സംഗീത പാരമ്പര്യത്തില്‍ കാവ്യാത്മകമായ പ്രകടനങ്ങള്‍ നടത്തിയതിനാണ് 2016 ലെ സാഹിത്യ നോബല്‍ ഡിലന് നല്‍കിയത്. എന്നാല്‍ തിരക്കുകാരണം ചടങ്ങിനെത്താന്‍ കഴിയില്ലെന്ന് ഡിലന്‍ അന്ന് വ്യക്തമാക്കി.

അക്കാദമിക്ക് എഴുതിയ കത്തിലാണ് ഡിലന്‍ പുരസ്‌കാരം സ്വീകരിക്കാനെത്തില്ലെന്ന കാര്യം അറിയിച്ചത്. നേരത്തെ ഏറ്റെടുത്ത ചില പരിപാടികള്‍ പൂര്‍ത്തിയാക്കാന്‍ ഉള്ളതിനാലാണ് ചടങ്ങിന് എത്താന്‍ കഴിയാതിരുന്നതെന്നായിരുന്നു വിശദീകരണം. 2016 ഡിസംബര്‍ 10 നാണ് നൊബേല്‍ പുരസ്‌കാരങ്ങള്‍ നല്‍കിയത്.

സാഹിത്യത്തില്‍ നൊബേല്‍ പുരസ്‌കാരം സ്വന്തമാക്കുന്ന ആദ്യ ഗാനരചയിതാവാണ് 75കാരനായ ബോബ് ഡിലന്‍.
ബ്ലോവിംഗ് ഇന്‍ ദി വിന്‍ഡ്, ദി ടൈംസ് ആര്‍ ചെയ്ഞ്ചിംഗ് എന്നീ ഗാനങ്ങളിലൂടെ പ്രശസ്തനായ ബോബ് ഡിലന് ഗ്രാമി, ഗോള്‍ഡന്‍ ഗ്ലോബ്, ഓസ്‌കാര്‍, പുലിസ്റ്റര്‍ എന്നീ പുരസ്‌കാരങ്ങളും ലഭിച്ചിട്ടുണ്ട്.