തിരുവനന്തപുരം: കൊവിഡ് 19ന്റെ മറവില്‍ വ്യക്തികളുടെ സ്വകാര്യ വിവരങ്ങള്‍ അമേരിക്കന്‍ മാര്‍ക്കറ്റിങ് പി.ആര്‍ കമ്പനിയായ സ്പ്രിങ്ക്‌ളറിന് വില്‍ക്കുകയാണെന്നു പ്രതിപക്ഷ നേതാവ് രമേശ് ചെന്നിത്തല.

സര്‍ക്കാര്‍ സംവിധാനത്തിലൂടെ രൂപീകരിച്ച വാര്‍ഡുതല കമ്മിറ്റികള്‍ ക്വാറന്റൈനില്‍ കഴിയുന്നവരുടെ പൂര്‍ണ വിവരങ്ങള്‍ ശേഖരിക്കുന്നുണ്ട്. ഈ വിവരങ്ങളെല്ലാം കേരള ഫീല്‍ഡ് കൊവിഡ് സ്പ്രിങ്ക്‌ളര്‍ ഡോട്ട് കോം എന്ന സൈറ്റിലേക്കാണ് അപ്‌ലോഡ് ചെയ്യുന്നത്. കേരള സര്‍ക്കാരിന്റെ ഔദ്യോഗിക ചിഹ്നംപോലും ഈ കമ്പനി ദുരുപയോഗം ചെയ്യുന്നു. സര്‍ക്കാരിന്റെ ചിഹ്നം എങ്ങനെ ഉപയോഗിക്കാന്‍ സാധിക്കുമെന്നും ഇതിന് ഇവര്‍ക്ക് ആരാണ് അനുമതി കൊടുത്തതെന്നും ചെന്നിത്തല വാര്‍ത്താസമ്മേളനത്തില്‍ ചോദിച്ചു.

സ്പ്രിങ്ക്‌ളറിന്റെ പരസ്യചിത്രത്തില്‍ മുഖ്യമന്ത്രിയുടെ സെക്രട്ടറിയും ഐ.ടി സെക്രട്ടറിയുമായ ശിവശങ്കരന്‍ അഭിനയിച്ചിട്ടുണ്ട്. ഒരു സ്വകാര്യ കമ്പനിയുടെ പരസ്യചിത്രത്തില്‍ അദ്ദേഹത്തിന് എങ്ങനെ അഭിനയിക്കാനാകും. ലഭിക്കുന്ന വിവരങ്ങള്‍ ഈ കമ്പനി വാണിജ്യ ആവശ്യങ്ങള്‍ക്ക് മറിച്ചുനല്‍കില്ല എന്നതിന് എന്താണുറപ്പ്. ഇത് അടിയന്തിരമായി റദ്ദു ചെയ്യാനുള്ള നടപടി സ്വീകരിക്കണം. മുഖ്യമന്ത്രിയുടെ ഐ.ടി സെക്രട്ടറിയെ മാറ്റിനിര്‍ത്തി അന്വേഷണം നടത്തണമെന്നും ചെന്നിത്തല ആവശ്യപ്പെട്ടു.

ഹോം ഐസൊലേഷനിലുള്ളവരുടെ  വ്യക്തി വിവരങ്ങള്‍ 41 ചോദ്യങ്ങളിലൂടെയാണ് ശേഖരിക്കുന്നത്. ഇതില്‍ 17-ാമത്തെ ചോദ്യം വളരെ ഗുരുതരമാണ്. രക്തസമ്മര്‍ദം, പ്രമേഹം, ഹൃദ്‌രോഗം, സ്‌ട്രോക്ക്, വൃക്കരോഗം, കാന്‍സര്‍, ശ്വാസകോശ രോഗങ്ങള്‍, തൈറോയ്ഡ് തുടങ്ങിയവയാണ് ഈ ചോദ്യത്തിലുള്ളത്.