മട്ടാഞ്ചേരി: പാണ്ടിക്കുടിയിലെ ബിവറേജസ് കോര്‍പ്പറേഷന്റെ മദ്യവില്‍പ്പന ശാലയില്‍ മദ്യം വാങ്ങാനെത്തിയവരുടെ തിരക്ക് മൂലം മണിക്കൂറുകളോളം ഗതാഗതം തടസപ്പെട്ടു.
രണ്ട് മദ്യശാലയാണ് ഇവിടെ പ്രവര്‍ത്തിക്കുന്നത്. രാവിലെ മുതല്‍ തന്നെ വലിയ നിരയാണ് ഇവിടെ രൂപപ്പെട്ടത്. ദേശീയ സംസ്ഥാന പാതകളിലെ മദ്യവില്‍പ്പന ശാലകള്‍ അടച്ച് പൂട്ടിയതോടെ ദൂര സ്ഥലങ്ങളില്‍ നിന്നുള്ളവര്‍ പോലും ഇങ്ങോട്ട് മദ്യം വാങ്ങാനെത്തിയതാണ് തിരക്ക് അനുഭവപ്പെടാനിടയാക്കിയത്.
ഏറെ തിരക്കുള്ള റോഡിലാണ് ഈ മദ്യശാലകള്‍ പ്രവര്‍ത്തിക്കുന്നത്. മദ്യം വാങ്ങാനെത്തിയവരുടെ വാഹനങ്ങള്‍ കൂടി റോഡരികില്‍ പാര്‍ക്ക് ചെയ്തതോടെ ബസ്സുകള്‍ ഉള്‍പ്പെടെയുള്ള വാഹനങ്ങള്‍ പോകാന്‍ കഴിയാത്ത അവസ്ഥയായി.
ബസുകള്‍ ഇരു വശത്തേക്കും പോകുന്നത് ഈ റോഡില്‍ കൂടിയായതിനാല്‍ ഗതാഗത തടസം രൂക്ഷമായി.ഒടുവില്‍ പൊലീസെത്തി ഗതാഗതം നിയന്ത്രിച്ചെങ്കിലും ഫലമുണ്ടായില്ല.ആളുകളുടെ തിരക്ക് കൂടി വന്നതോടെ യാത്രക്കാരും മദ്യം വാങ്ങാന്‍ എത്തിയവരും തമ്മില്‍ നേരിയ തോതില്‍ സംഘര്‍ഷവുമുണ്ടായി.
തിരക്ക് നിയന്ത്രണാതീധമായതോടെ ഒടുവില്‍ പൊലീസിന് ലാത്തി വീശേണ്ടതായി വന്നു.ഫോര്‍ട്ട്‌കൊച്ചി അമരാവതിയിലെ മദ്യവില്‍പ്പന ശാലയിലും വലിയ തിരക്കാണ് അനുഭവപ്പെട്ടത്.വൈകിട്ടോടെയാണ് ഗതാഗത തടസത്തിന് ശമനമായത്.