ഗ്വാട്ടിമാല സിറ്റി: ഗ്വാട്ടിമാലയിലെ ഫ്യൂഗോ അഗ്നി പര്‍വത സ്‌ഫോടനത്തില്‍ മരിച്ചവരുടെ എണ്ണം 99 ആയി.190 പേരെ ഇനിയും കണ്ടെത്താനുണ്ടെന്ന് അധികൃതര്‍ അറിയിച്ചു. ബുനാഴ്ച 28 പേരുടെ മൃതദേഹങ്ങള്‍ കണ്ടെത്തി. കാണാതായവര്‍ക്കായുള്ള തിരച്ചില്‍ തുടരുകയാണ്. നിരവധി പേര്‍ ഇപ്പോഴും അഗ്നിപര്‍വത സഫോടനത്തിലെ ചാരത്തിലും ചളിയിലും കുടുങ്ങിയിട്ടുണ്ട്. ഞായറാഴ്ചയുണ്ടായ അഗ്നിപര്‍വത സ്‌ഫോടനം 17 ലക്ഷം പേരെയാണ് ബാധിച്ചത്. 3,000 പേരെ ഒഴിപ്പിച്ചു.
ഗ്വാട്ടിമാലയില്‍ നൂറ്റാണ്ടിലെ ഏറ്റവും വലിയ അഗ്നിപര്‍വത സ്‌ഫോടനമാണ് ഞായറാഴ്ചയുണ്ടായത്. തലസ്ഥാനമായ ഗ്വാട്ടിമാല സിറ്റിയില്‍നിന്ന് 40 കി.മീറ്റര്‍ അകലെ തെക്കുപടിഞ്ഞാറു മാറി സ്ഥിതി ചെയ്യുന്ന ഫ്യൂഗോ അഗ്നിപര്‍വതമാണു പൊട്ടിത്തെറിച്ചത്. ലാറ്റിനമേരിക്കയിലെ തന്നെ ഏറ്റവും സജീവമായ അഗ്നിപര്‍വതമാണ് ഫ്യൂഗോ.