കോട്ടയം: കെവിന്റെ കൊലപാതകത്തിലെ പ്രതികള്‍ക്ക് കേസില്‍നിന്ന് രക്ഷപ്പെടാനാണ് തനിക്ക് മാനസികരോഗമുണ്ടെന്ന് വരുത്തിത്തീര്‍ക്കുന്നതെന്ന് ഭാര്യ നീനുവിന്റെ പ്രതികരണം . തനിക്ക് മാനസികപ്രശ്‌നങ്ങളില്ല. തന്നെ ഒരു മാനസികാരോഗ്യകേന്ദ്രത്തിലും ചികിത്സയ്ക്ക് കൊണ്ടുപോയിട്ടില്ല. അത് തന്റെ സുഹൃത്തുക്കളില്‍ ആരോട് ചോദിച്ചാലും മനസിലാവും. മുന്‍പ് വീട്ടിലെ പ്രശ്‌നങ്ങളെത്തുടര്‍ന്ന് ഒരുതവണ കൗണ്‍സലിങ്ങിന് കൊണ്ടുപോയിട്ടുണ്ട്. അന്ന് വീട്ടിലെ അവസ്ഥകള്‍ പറഞ്ഞപ്പോള്‍ തനിക്കല്ല, മാതാപിതാക്കള്‍ക്കാണ് കൗണ്‍സലിങ് വേണ്ടതെന്നാണ് ഡോക്ടര്‍ പറഞ്ഞത്. നീനുവിന് മാനസികപ്രശ്‌നമുണ്ടെന്നും തുടര്‍ ചികിത്സയ്ക്കായി കെവിന്റെ വീട്ടില്‍നിന്ന് മാറ്റണമെന്നുമാവശ്യപ്പെട്ട് പിതാവ് ചാക്കോ ഏറ്റുമാനൂര്‍ കോടതിയെ സമീപിച്ചതിനോട് പ്രതികരിക്കുകയായിരുന്നു നീനു.
സ്വന്തം വീട്ടില്‍ കുട്ടിക്കാലം മുതല്‍ ക്രൂരമായ മര്‍ദനവും മാനസികപീഡനവുമാണ് നേരിടേണ്ടിവന്നത്. മാതാപിതാക്കള്‍ ഇതിനു മുന്‍പും തന്നെ ഉപദ്രവിക്കുകയും അസഭ്യം പറയുകയും ചെയ്തിട്ടുണ്ട്. ഒരിക്കല്‍ അമ്മ ടി.വി വച്ചപ്പോള്‍ ഓഫ് ചെയ്തതിന്റെ പേരില്‍ അച്ഛന്‍ തന്നെ ക്രൂരമായി മര്‍ദിച്ചതിന് അയല്‍വാസികളും സാക്ഷിയാണ്. നാട്ടുകാര്‍ കാണുമെന്ന് മനസിലായപ്പോള്‍ മുടിക്ക് കുത്തിപ്പിടിച്ച് വീട്ടിനകത്തുകൊണ്ടുപോയി വിറകുകമ്പുകൊണ്ടും മര്‍ദിച്ചു. തന്നോട് സ്‌നേഹാഭ്യര്‍ഥനയുമായി വന്ന ഒരാളെ അമ്മ മുന്‍പ് മര്‍ദിച്ചിട്ടുണ്ട്.
എന്തുസംഭവിച്ചാലും തന്റെ മാതാപിതാക്കളുടെ അടുത്തേക്ക് മടങ്ങിപ്പോവില്ല. കെവിന്റെ ജീവനെടുത്തവരുടെ സംരക്ഷണം സ്വീകരിക്കില്ല. കെവിന്റെ അച്ഛനും അമ്മയും തന്നോട് ഇവിടുന്ന് പോവാന്‍ പറയുന്നതുവരെ താന്‍ ഈ വീട്ടില്‍ത്തന്നെ തുടരും. എന്നാല്‍, അവരൊരിക്കലും അങ്ങനെ പറയില്ലെന്ന് തനിക്കറിയാം. കെവിന്റെ വീട്ടിലെ താമസമില്ലാതാക്കാനാണ് ഇപ്പോഴത്തെ ആരോപണങ്ങള്‍. കെവിനെ ഇല്ലാതാക്കാനുള്ള ഗൂഢാലോചനയില്‍ തന്റെ അമ്മയ്ക്കും പങ്കുണ്ടെന്നും നീനു വ്യക്തമാക്കി. അതേസമയം, കേസിലെ പ്രതികളെയെല്ലാം പ്രധാന സാക്ഷിയായ അനീഷ് തിരിച്ചറിഞ്ഞു. സംഭവത്തില്‍ നേരിട്ട് ഇടപെട്ട 13 പേരെയാണ് തിരിച്ചറിഞ്ഞത്. കേസില്‍ അറസ്റ്റിലായ 14 പേരില്‍ ചാക്കോ ഒഴികെ 13 പേരെയാണ് മുഖ്യസാക്ഷി അനീഷിന് മുന്നില്‍ തിരിച്ചറിയാനായി എത്തിച്ചത്. കസ്റ്റഡി കാലാവധി തീരുന്നതിന് മുന്‍പ് തെളിവെടുപ്പ് പൂര്‍ത്തിയാക്കാനാണ് അന്വേഷണസംഘം ശ്രമിക്കുന്നത്. തട്ടിക്കൊണ്ടുപോവാന്‍ ഉപയോഗിച്ച ആയുധങ്ങളും അനീഷ് തിരിച്ചറിഞ്ഞു.