ഡെറാഡൂണ്‍:ഉത്തരാഖണ്ഡിലെ കനത്ത മഴയിലും മേഘ വിസ്‌ഫോടനത്തിലും മരിച്ചവരുടെ എണ്ണം 40 കവിഞ്ഞതായി റിപ്പോര്‍ട്ട്. നിരവധിപേരെ കാണാതായതായും അധികൃതര്‍ അറിയിച്ചു. ചമോലി, പിത്തോറാഗ് എന്നീ വിദൂര ഗ്രാമങ്ങളെയാണ് ദുരിതം ഏറ്റവും കൂടുതല്‍ ബാധിച്ചത്. ഗ്രാമങ്ങളില്‍ സൈന്യത്തിന്റെയും ദേശീയ ദുരന്ത നിവാരണ സേനയുടെയും നേതൃത്വത്തില്‍ രക്ഷാപ്രവര്‍ത്തനം നടക്കുന്നുണ്ട്. ഇപ്പോഴും തുടരുന്ന കനത്ത മഴയും വാര്‍ത്താ വിനിമയ ബന്ധങ്ങളുടെ തകരാറും രക്ഷാപ്രവര്‍ത്തനങ്ങളെ ബാധിക്കുന്നുണ്ട്. അവശിഷ്ടങ്ങള്‍ക്കിടയില്‍ നിന്നും മൃതദേഹങ്ങള്‍ ലഭിക്കുന്നതായും റിപ്പോര്‍ട്ടുണ്ട്. ഇങ്ങനെ ലഭിച്ച 14 മൃതദേഹങ്ങള്‍ സംസ്‌കരിച്ചതായി ഉത്തരാഖണ്ഡ് പൊലിസ് അറിയിച്ചു. മനുഷ്യര്‍ക്ക് പുറമെ നിരവധി വളര്‍ത്തു മൃഗങ്ങളും മഴയിലും മണ്ണിടിച്ചിലിലും നഷ്ടമായിട്ടുണ്ട്. പ്രളയം രൂക്ഷമായതോടെ ഡല്‍ഹിയില്‍ നിന്നും ദേശീയ ദുരന്ത നിവാരണ സംഘം സ്ഥലത്തെത്തി. അവശിഷ്ടങ്ങള്‍ക്കിടയില്‍ നിന്നും ജീവനോടെ ചിലരെ രക്ഷപ്പെടുത്തിയെന്ന് രക്ഷാപ്രവര്‍ത്തനത്തിലേര്‍പ്പെട്ട സൈനികര്‍ ട്വീറ്റ് ചെയ്തിട്ടുണ്ട്.