കോഴിക്കോട്: എസ്.കെ.എസ്.എസ്.എഫ് സംസ്ഥാന കമ്മിറ്റി, കുവൈത്ത് കേരള ഇസ്‌ലാമിക് കൗണ്‍സിലിന്റെ സഹകരണത്തോടെ നടപ്പിലാക്കുന്ന കോസ്റ്റല്‍ കെയര്‍ പദ്ധതിയുടെ രണ്ടാം ഘട്ടമായി ഏപ്രില്‍ 5 മുതല്‍ ഇബാദ് ഖാഫില സംഘം പര്യടനം നടത്തും. തീരദേശ വിദ്യാഭ്യാസ സാമൂഹിക ശാക്തീകരണം ലക്ഷ്യം വച്ച് സംസ്ഥാനത്തെ തെരഞ്ഞെടുക്കപ്പെട്ട പത്ത് തീരദേശങ്ങള്‍ കേന്ദ്രീകരിച്ച് ഏപ്രില്‍ , മെയ് മാസങ്ങളില്‍ മൂന്ന് ഘട്ടങ്ങളായാണ് പരിപാടികള്‍ നടക്കുക.
ഗൃഹ സമ്പര്‍ക്ക പരിപാടികള്‍, കരിയര്‍ ഗൈഡന്‍സ്, ലഹരി വിരുദ്ധ ബോധവല്‍കരണം, സര്‍ക്കാര്‍ ക്ഷേമ പദ്ധതികള്‍ പരിചയപ്പെടുത്തല്‍ തുടങ്ങിയവ പദ്ധതിയുടെ ഭാഗമായി നടക്കും.
പത്ത് കേന്ദ്രങ്ങളിലേക്ക് നിയോഗിക്കപ്പെട്ട ഖാഫില അംഗങ്ങള്‍ക്കുള്ള പരിശീലന ക്യാംപ് കോഴിക്കോട് ഇസ്‌ലാമിക് സെന്ററില്‍ കുവൈത്ത് കേരള ഇസ്‌ലാമിക് കൗണ്‍സില്‍ ചെയര്‍മാന്‍ ശംസുദ്ദീന്‍ ഫൈസി എടയാറ്റൂര്‍ ഉദ്ഘാടനം ചെയ്തു.
സയ്യിദ് ഹാഷിം തങ്ങള്‍ വല്ലപ്പുഴ അധ്യക്ഷനായി. ആസിഫ് ദാരിമി പുളിക്കല്‍, ഡോ.സുബൈര്‍ ഹുദവി ചേകന്നൂര്‍, ശാജിഹ് സമീര്‍ അസ്ഹരി, ഹൈദര്‍ അലി വാഫി ഇരിങ്ങാട്ടിരി, ശരീഫ് പൊന്നാനി എന്നിവര്‍ ക്ലാസെടുത്തു. അബ്ദുള്ള റഹ്മാനി, മുഹമ്മദ് റഫീഖ് ചെന്നൈ, പി മുഹമ്മദ്, യഹ്‌യ വെള്ളയില്‍ ചര്‍ച്ചക്ക് നേതൃത്വം നല്‍കി.